amalinks wokungena

Amaqembu Enguqu Alungiselela Imidlalo yePremier Soccer League

  • Joseph Njanji

Liyakhuphuka izinga lamalungiselelo emidlalo yalonyaka eyesigaba se Castle Premier Soccer League njalo ngoLwesithathu iqembu le Chicken Inn lidibane leqembu le Bantu Rovers emdlalweni wokuzwana amandla.

Amaqembu omdlalo wenguqu adlala kusigaba saphezulu ese Premier Soccer League asecolisisa amalungiselelo awokukhetha abadlali abazawamela kumidlalo yalonyaka yona ekhangelelwe ukuqala ekuqaleni kwenyanga kaMabasa njalo ekuseni iqembu le Chicken Inn linqobe ele Bantu Rovers nge 3 ka nya emdlalweni lo odlalelwe enkundleni yeLuveve.

Iqembu le Chicken Inn yilo eliphakamise isicoco ngomnyaka ka 2015 kodwa nyakenye liphutshe imidlalo yalo liphakathi laphakathi kwenkundla ngemva kokuba lithengise abadlali abambalwa ikanti lomqeqetshi uJoey Antipas wayasebenzela elizweni le South Africa ngemva kokuphatheka kwalo kumidlalo ye African Champions League.

Umqeqetshi wabonozinti weqembu leli uJulius Ndlovu uthi lonyaka bakhangelele ukuqhuba ngcono njengoba bengalahlekelwanga ngabadlali ekupheleni kwanyakenye.

“Inani elingamatshumi ayithoba minwe mbili ekhulwini ngabadlali ebesivele silabo nyakenye kuthi abalitshumi ekhulwini ngabavele kwamanye amaqembu kuthi elinye itshumi ekhulwini ngabadlali esibathethe kuqembu lethu labasakhulayo. Iqembu le Chicken Inn likhulu yikho ke lonyaka siyabe silwisa ukuphakamisa inkezo.”

Ngakwelinye icele iqembu le Bantu Rovers like lahlala iminyaka ethile lisenkangala lidlala kusigaba sika Division One ngemva kokuba lehluleke ukuhlala kuPSL okwemihla emibili eyadlulayo.

Umqeqetshi uAgent Sawu uthi loma kanjani lonyaka iqembu le Bantu Rovers lizasinda ekugunyulweni kusigaba saphezulu loba nje lizaqhubekisela phambili umkhuba walo wokudlalisa abadlali abasakhulayo.

“Amalungiselelo ethu ahamba kuhle, sesikuviki lesihlanu lamalungiselelo ethu njalo sesidlale lamaqembu amabili adlala kusigaba se PSL. Umkhuba walapha kuqembu le Bantu Rovers ngowokupha abafana abancane ithuba lokuba badlale njalo labo abafana kumele balibambe ngezandla zombili lelithuba. Lonyaka sizoncintisa ku PSL njalo kasiyindawo.”

Inhlanganiso ye Premier Soccer League ilaye ukuba amaqembu alethe amagama abadlali bawo balonyaka ekupheleni kwenyanga edluleyo kodwa amaqembu alakho ukwenza inguquko kulawo magama kungakafiki usuku lokucina lwenyanga kaMbimbitho njengoba kusaselabadlali abasadinga umsebenzi abangakavumelani lamaqembu.

Ngenxayalokho bakhona abanye abadlali ababonakale bedinga umsebenzi kuqembu le Bantu Rovers ekuseni abaphinde batholakala njalo sebedinga emini kuqembu leTsholotsho lona ebelidlala umdlalo wokuzwana amandla leqembu le Talen Vision enkundleni ye White City.

Facebook Forum

XS
SM
MD
LG