amalinks wokungena

Breaking News

Iqembu leSupport Unit leleHarare City Anqoba Kumncintiswano weZone VI Volleyball Club Championships


Iqembu labesifazana emdlalweni weVolleyball ele Harare City Ladies Volleyball Club.

Amaqembu awe Zimbabwe athi ele Support Unit kanye lele Harare City yiwo anqobe kumncintiswano we Zone VI Volleyball Club Championships obuqhutshelwa edolobheni lako Bulawayo.

Iqembu le Harare City liphakamise isicoco kumncintiswano wabesifazane ngemva kokunqoba ele Botswana Defence Forces VI nge 3 ka 1 lathola imendulo zegolide kuthi ele BDF VI lathola imendulo zesiliva.

Iqembu le Kamplits elase South Africa lithole imendulo eyombala wethusi ngemva kokunqoba ele VUT emdlalweni wokudinga iqembu eliphutshe lisendaweni yesithathu nge 3 ka nya.

Iqembu le Harare City ndawonye lele BDF, ele Kamplits kanye lele VUT athe ngokuphutsha esendaweni ezine eziphezulu kumncintiswano wabesifazane zathola ilungelo elokuyamela umhlubulo wangezansi yezwekazi lase Africa kumncintiswano wokudinga izwekazi lase Africa ozakuba khona ngomnyaka ozayo.

Umdlali weqembu le Harare City uAlvina Sibanda uthi kuzamele belungiselele kanzima ukuze benelise ukuncintisana lentshantshu zakwezinye izigaba zelizwekazi lase Africa.

Sikhangelele ukuhle siqalise amalungiselelo ethu umnyaka ungakapheli kumbe ekuqaleni komnyaka ozayo ukuze sibe lesikhathi eside esokulungiselela siliqembu. Kumele silungiselele nzima ngoba siyabe sesihlangana lamaqembu atshonela ukudlala umdlalo we volleyball.

Kucele labesilisa iqembu le Support Unit linqobe ele UZ Wolves nge 3 ka 1 lathola isicoco kanye lemendulo zegolide kwathi ele UZ Wolves lithole imendulo zesiliva.

Iqembu le Redskins elase Lesotho yilo elithole imendulo zombala wethusi ngemva kokunqoba ele Uni Jozi nge 3 ka 1 emdlalweni wokudinga iqembu eliqede imidlalo lisendaweni yesithathu.

Umqeqetshi weqembu le Support Unit u Itsanang Abu – Basutu uthi baphumelele ngoba besebenze gadalala belungiselela limidlalo.

Kumnandi ukunqoba kodwa kuyimpumela eyokusebenza kanzima. Besisebenza njalo besilenjongo ngoba sesake sathatha imendulo yethusi leye siliva yikho besizimisele ukuthatha igolide. Imfihlo engemva kokuphumelela kwethu yikuzilolonga ngendlela eqondileyo.

Iqembu le Harare City, ele UZ Wolves, ele Redskins kanye lele Uni Jozi yiwo azamela isigaba sika Zone VI kumncintiswano we African Club Championships ngomnyaka ozayo ngenyanga kaMabasa ozaqhutshelwa elizweni elikhona lizaqanjwa.

Umncintiswano we Zone VI Volleyball Club Championships uzaqhutshelwa edolobheni leDurban eliselizweni lase South Africa.

Facebook Forum

XS
SM
MD
LG