amalinks wokungena

Amaqembu Akhangelelwe Ukugqikilana Kunkezo yeHeroes Trophy NgoMvulo


Imisiwe imidlalo yePremier Soccer League ngesikhathi kulungiselelwa imidlalo yeHeroes Trophy.

Imidlalo yenguqu eyesigaba seCastle Lager Premier Soccer League izamiswa kulimpelaviki kudedelwa imidlalo eyokuthakazelela ikhefu lokukhumbula amaqhawe alwela inkululeko yelizwe le Zimbabwe.

Imidlalo yenguqu eyokunanza ikhefu lamaqhawe izadlalwa ngoMvulo endaweni ezitshiyeneyo zelizwe.

Kulemidlalo yenguqu engamatshumi amathathu lanye eqoqwe ukuba idlalwe ngoMvulo kuyingxenye yenhlelo zokunanza amaqhawe alwa impi yenkululeko eyaletha uzibuse elizweni le Zimbabwe.

Lokhu kudale ukuba kumiswe imidlalo yeviki lamatshumi amabili lambili eyesigaba se Castle Premier Soccer League obekumele idlalwe ngoMgqibelo langeSonto.

Limidlalo izakupha ithuba abantu abangavamanga ukubukela amaqembu adlala kusigaba se PSL ukuba beke bewabone esenza adume ngakho, njengoba amanye awo ezakuyadlala emadolobheni amancane angela maqembu adlala kusigaba saphezulu, ikanti amanye awo azadlala lamaqembu adlala kuzigaba ezingaphansi.

Njengesibonelo, iqembu le Ngezi Platinum lele CAPS United azadibanela edolobheni le Chinhoyi kuthi amanye amaqembu adlala ku PSL azadlalela emadolobheni amancane ngagoqela ele Harare City lona elizavakatshela ele Chegutu Pirates khonale ngase Chegutu, kuthi ele Black Rhinos lizadlala lele Yadah eMarondera.

Loba nje limidlalo izakupha ithuba labo abangahlali emadolobheni amakhulu ukuba bake bebone inguqu yezinga laphezulu, intathelizindaba yezemidlalo uNation Ndlovu uthi ilakho ukuphazamisa inhlelo ze Premier Soccer League njengoba bekuvele imidlalo isidlalwa buthumuthumu ngempelasonto kanye laphakathi kweviki.

“Ukumiswa kwemidlalo yePremier League kulimpelaviki ngibona angani kuzaphazamisa amaqembu amanengi ikakhulu lawa alwisa ukuba abe phezulu kwengalane ngoba abedlala kuhle njalo ngibona angazani imidlalo yethu lapho esikhona lalapho okulomnyaka khona isele isaseminengi okokuthi kuzaphazamisa ukuthi imidlalo le iphutshe kuhle ekupheleni komnyaka.”

Kudala isimo somkhonomi singakami manzonzo amaqembu adlala kusigaba saphezulu ayedlalela inkezo ye Heroes Day Trophy kodwa lumncintiswano ulesikhathi eside ungaqhutshwa.

Imidlalo yangoMvulo iqoqwa yinhlanganiso yeZimbabwe Football Association isebenzisana logatsha lwezemidlalo lokuzilibazisa kodwa akukacaci ukuba kuyini okuzatholwa ngamaqembu azaphatheka kuyo.

Esigodlweni iHarare kuyabe kudibene inkunzi zomdlalo kwele Zimbabwe iqembu le Dynamos lele Highlanders kuthi ko Bulawayo iqembu le Chicken Inn lizadlala lele Bulawayo City ikanti eZvishavane iqembu le FC Platinum lixegwe leqembu le Shabanie Mine.

Amaqembu akhangelelwe ukuba aphe ithuba abadlali abangajwayelanga ukudlala ukuze ephumuze labo abadlali abathenjiweyo njengoba sekumele kucace ukuba yiwaphi amaqembu alwisa ukuphakamisa isicoco se PSL kanye lalawo azama ukubalekela ukugunyulwa kusigaba saphezulu.

Facebook Forum

XS
SM
MD
LG