Izakhamizi zedolobho le Harare zithi sezidlela evalweni kulandela ukusuka kwamasotsha ezitaladeni lapho kade elondoloza khona ukuthula engakhahlamezi uzulu ikanti amapholisa wona seqalile ukubonakala osekutshiye abanye besithi sebezadliswa imbuya ngoluthi behlawuliswa imali zesifumbatho.
Kusukela mhla ka 15 Lwezi lapho amasotsha ahluthuna intambo zombuso bekuyiwona abebonakala ezitaladeni elondoloza ukuthula esenza umsebenzi wamapholisa wona kade engasabonwa njengelihlo lentwala.
Kodwa amasotsha aseqalile ukusuka ezitaladeni wona amapholisa aseqalile ukubonakala lapha lalaphaya.
Emgwaqweni lapha okwande ukunyakazela amapholisa evimba izimoto kuma road block, besekubetha umoya, abatshayeli bezihambela kungela nkinga lanxa bebemiswa lapha lalaphaya.
Kungalesi sizatho ke uzulu, okubalisa uMnu. Themba Sigola othi ukhathazekile ngokuza kwamapholisa emgaqweni. Uthi yena labanye bakhe besebephumule ukuhlukunyezwa ngamapholisa lapho beqhuba imisebenzi yabo eyehlukeneyo.
USigola uthi ukhangelele ukuba amapholisa ezolandela umzekeliso abawunikezwe ngabakubutho, kwezokuqhuba umsebenzi.
Omunye wabakade besebenzelana labenhlanganiso ye Occopy Africa Unity Square kumikhankaso yokususwa kukalowo owayengumongameli, uMnu. Stephen Sibanda, utshele lumsakazo ukuba bekumele amasotsha asuke ezitaladeni ngoba okwabo sekuphelile.
Umnumzana Charles Nyoni, ophatheke kumikhankaso yokulwela ukulondolozwa kwelungelo loluntu kanye lombuso oqotho uthi lanxa ewuncoma umsebenzi owenziwe ngabakubutho wethuswa ngumcabango wokuba amasotsha asenanzelele ukuba bala amandla okugenqula uhulumende.
Lanxa bekulokuthula ngesikhathi abakubutho behluthuna intambo zombuso baphatha uzulu ngendlela encomekayo,u Nyoni ethi lokho okukususi ukuba konke okwenziwayo kwakungaphandle komthetho.
Ukusuka kwabakubutho ezitaladeni kuqale ukubonakala ngoLwesihlanu ngemva kokugcotshwa ngokusemthethweni umongameli welizwe omutsha, umnumzana Emmerson Dambudzo Munangagwa.
