amalinks wokungena

Breaking News

Amasotsha Athwalise Nzima Abantu Abethekelela eZimbabwe leBotswana


Amasotsha afuna abantu baveze izithupha emigwaqweni.
Amasotsha afuna abantu baveze izithupha emigwaqweni.

Izihambi eziya lezivela kwele Zimbabwe leleBotswana zikhonona ngokuphuziswa kumigoqo esemgwaqweni - ama roadblocks – lapho abahlolisiswa khona ngamasotsha afuna ukuthi baveze izithupha zabo. Bathi amasotsha akhanya edinga abantu abangaziwayo.

Ukuhamba phakathi kweZimbabwe leBotswana bekusaziwa ukuthi yindaba ebuhlungu, ngenxa yemigoqo yama roadblocks, angapheliyo, usuka koBulawayo uze uyengena ePlumtree.

Ngakho-ke ukuphuma kwamapholisa kwangena amasotsha emgwaqweni ngaphansi kkukahulumende omutsha okhokhelwa nguMongameli Emmerson Mnangagwa, kwabonakala njengendlela yokulungisa udaba lolu.

Kodwa ezinye izihambi zithi lokhe phose kufana lakuqala ngoba khathesi, noma nje amasotsha engadingi okunengi, abehlisa ezimoteni, ikakhulu abahamba ngamabhasi, bedinga izithupha.

UMnu. Owen Ndlovu uthi amasotsha kumele azame ukungachithi isikhathi sezihambi njengalokho obekusenziwa ngamapholisa.

“Noma nje sibuka ukuthi amapholisa ayenza kahle ukuthi alwisane lokufumbathisana, kuyadina ukuthi kwenzinye indawo siyehliswa kuma road blocks, ngitsho labadala abakhulileyo, bayehliswa, kufunakala izithupha.”

UNkosikazi Sitheni Nkosi uthi akulunganga ukuthi amasotsha achitha isikhathi sabantu edinga izithupha zezihambi.

“Kukhanya sesibuyele esikhathini sakudala lapho okumele uhambe uthwele isithupha. Siyafisa ukuhamba sikhululekile ngoba uma ukhohlwe isithupha uyazibuza ukuthi kuyini okungenzakala uma bangakumisa bafune leso sithupha.”

UMnu. Andreas Mpofu uthi amasotsha kumele adinge indlela engcono yokwenza umsebenzi wabo.

“Lanxa inengi likhangelele ukuya ekhaya, sokulodubo lwamasotsha ahamba esihlisa abantu bedinga izithupha. Yikho esikade sikhonona ngakho ngokuphuziswa ngamapholisa. Amasotsha kawadinge indlela engcono yokwenza umsebenzi wabo, lanxa bedinga izigelekeqe.”

Ngaphansi kukahulumende ka Mongameli Robert Mugabe, inengi lezihambi zazikhonona ngokugcwala kwamapholisa emigwaqweni abanye befuna ukufumbathiswa.

Amasotsha aqalise ukusebenzelana lamapholisa uMugabe sephume esikhundleni. Ibutho lihluthune intambo zombuso labamba ngamandla uMugabe ukuthi asuke esikhundleni kungene uMnangagwa.

Izethekeli ezinengi, ziphendula imbuzo ye survey nyakenye, zakhomba ukuthi azithakazeleli ukuhamba zimiswa okungapheliyo kumigoqo yama road blocks, lapho amapholisa ayebikwa efuna ukufumbathiswa.

XS
SM
MD
LG