amalinks wokungena

Breaking News

Abanye Abantu eZimbabwe Bathabela Ukutshaywa Kwamapholisa Ngamasotsha


Zimbabwean Soldiers

Uzulu eHarare wamukele ngemibono eyehlukeneyo isehlakalo sokubhaxabulwa kwamapholisa ngoMvulo eHarare ngabakubutho abanye besithi kulungile lokho kodwa kulabanye njalo abakusolileyo.

Abakusolayo bathe ukulwa kwabo kungabangela udlakela olumangalisayo eZimbabwe.

Abakubutho babikwa bethethe lelinyathelo lokutshaya amapholisa njengendlela yokuphindisela okwenzakale komunye wabo ohlukunyezwe waphoselwa asebenzise amava asethethweni – ama spikes – ukupontshisa imota ebitshayelwa lisotsha.

Abakubutho, inengi labo kungabohlangothi lwe Military Police, babikwa betheleke ngoLwesibili kusihlwa, bezonde beganunwabu kuRobert Mugabe Road, baqala ukubhaxabula ngemvubu inqe ipholisa, elitholakale kulendawo.

Inengi lamapholisa la kuyilawayana acathamela abemitshova kanye labatshayela izimota, bebamisa ngendlela yokubaphosela ama spike.

UMnu. Nqabutho Nkala, ongomunye wabekade besedolobheni ngesikhathi lokhu kusenzakala, uthe uyakujabulela okwenziwe kumapholisa la.

Usule ukusebenzisa kwabo insimbi zama spike, zona okwathiwa akumelanga ziphoselwe phambi kwemota igijima ngoba kuyingozi engabangela ukulimala loba ukulahlekelwa yimpilo kwabantu.

Kodwa isikhulumeli ebandleni le People’s Democratic Party, esigabeni se Harare, uMnu. Thamsanqa Khumalo, uthe lokhu kutsho ukuba uzulu akavikelekanga kakhulukazi wamabandla aphikisayo.

Amapholisa abikwa esabalale elubhekise enkambeni yawo, eHarare Central Police Station, lapho afike azivalela khona ebalekela ulaka lwabakubutho bona abekade besenza okukuwazingela.

Ekuqaleni uzulu eke wabaleka, ecabanga ukuba kuyibo abekade beqondwa ngabakubutho laba, wasenanzelela ukuba ulaka beluqondiswe kwabase sipholiseni lokho obekusenziwa ngabakubutho.

Lokhu kungasi kwakuqala, amapholisa ephindisela lapho omunye wabo ethe wathwaliswa nzima, besebeqophana lalolohlangothi ukuphindisela.

Facebook Forum

XS
SM
MD
LG