amalinks wokungena

Breaking News

'Kumele uGeneral Valerie Sibanda Aveze Okuzakwenziwa Ngamasotsha uMnangagwa Anganqotshwa Kukhetho'


UMongameli Emmerson Mnangagwa ulakho ukunqotshwa kukhetho oluzayo.

Umanyano wamabandla ambalwa oweMDC Alliance okhokhelwa nguMnu. Nelson Chamisa uthi umkhokheli webutho, uGeneral Phillip Valerio Sibanda, kumele athembise uzulu ukuthi amabutho azahlonipha impumela yokhetho lwalonyaka lokuthi abasoze bangenele nxa uMongameli Emmerson Mnangagwa engehlulwa kukhetho.

Lokhu kuphume ngemva kokuba uMnu. Sibusiso Moyo, umphathintambo wezobudlelwano beZimbabwe lamanye amazwe womhlaba, ethembise umhlangano awenzelwe eBhilithani oweChatham House ukuthi ibutho lizahlonipha impumela yokhetho lokuthi uMnangagwa uzavuma ukusuka esikhundleni nxa enganqotshwa kukhetho.

Isikhulumeli seMDC Alliance, uMnu. Welshman Ncube, wethule umbiko wokuphendula kulesi saziso esithi okhokhela ibutho kumele abenguye otsho njalo hatshi uMoyo.

Wengeze esithi uGeneral Sibanda kumele akhiphe amasotsha aseligcwalise emaphandleni njengoba besazi ukuthi yindlela yokwethusela uzulu besenzela ukuthi iZANU PF inqobe kukhetho lwalonyaka.

Lokhu kuqonqoselwe nguMnu. Khaliphani Phugeni, omele isikhulumeli seMDC-T ekhokhelwa ngoNkosikazi Thokozani Khupe, othi kumele uhulumende alungisise udaba lwabebutho, amapholisa ensitha aweCentral Intelligence Organization ukhetho lungakafiki nxa efuna ukhetho luqhutshwe ngokuthula njalo luhloniphekayo.

Ingcitshi ecubungula ezombusazwe, uMnu. Mlungisi Ncube, uthe akufezeki okukhulunywe ngamabandla la njengoba amasotsha leZANU PF belobudlelwano.

Uphinde wathi uMoyo ubekutsho lokhu ngoba ubephambi kenkokheli yakwamanye amazwe azazohlola ukhetho lweZimbabwe luqhutshwa.

Osakhulayo, uMnu. Evans Masuku, uthe kuqakathekile ukuthi uzulu abekwazi ukuthi ukhululekile ukuthi avotele abantu abafisayo.

UNkosikazi Angela Moyo yena uthi akalandaba ukuthi kukhulunywe ngubani, okufunakalayo yikuthi ibutho lihloniphe ukhetho ukuze luqhutshwe kusimo esilokuthula.

Umpathintambo obona ngendaba zobudlelwano beZimbabwe lamanye amazwe womhlaba, ukwele Bhilithani lapho anxuswe khona ngomunye wakhe uMnu. Boris Johnson.

URetired Major General Moyo ukhulume kabanzi ngokuthi ilizwe leZimbabwe libuyele kunhlanganiso yeCommonwealth.

Azavuma Na Amasotsha Ukuthi Kubuse Ibandla Eliphikisa Elibusayo?
please wait

No media source currently available

0:00 0:04:12 0:00

Facebook Forum

XS
SM
MD
LG