amalinks wokungena

Breaking News

Amazwe Atshiyeneyo Achothoza Udlakela Kubandla leMDC-T


Annastacia Ndlovu

Amazwe omhlaba lokhe eqhubekela phambili esola ingxabangxoza ekubandla leMDC-T besithi kumele lulungisiswe ngokuphangisa ngoba lulakho ukuphazamisa ukhetho oluqakathekileyo lonyaka okukhangelelwe ukuthi kuzavota abantu abedlula izigidi ezinhlanu.

NgoLwesine koBulawayo, eBulawayo Art Gallery, inkokheli yeEuropean Union, Bhilithani, Portugal, Netherlands leRomania isole kakhulu udlakela olukubandla leMDC-T, lakwamanye amabandla ezombusazwe.

Inengi labantu lithi loludlakela lwavele lwaqala kusukela ngomnyaka ka2005, kodwa lusuke lwakhuphuka ngokugula langokubhubha kuka Morgan Richard Tsvangirai obengomongameli webandla leli.

Lokhu kwenzakale ngesikhathi ilizwe liphakathi kokulungiselela ukhetho.

Ummeli weEU eZimbabwe, uMnu. Philippe Van Damme, usole kakhulu udlakela olukuMDC-T lamanye amabandla esithi akusosibonelo esihle emhlabeni jikelele.

Uthe inkokheli yeMDC-T kayihlale phansi ilungisise loludaba lungakamemetheki.

Evumelana laye, ommele ele Bhilithani eZimbabwe, uNkosazana Catriona Liang, laye usole loludlakela esithi luyisibonelo esibi njalo luzaphazamisa ukhetho oluzayo.

Ommele ilizwe leNetherland, uNkosazana Barbara Van Hellemond, uthi ilizwe lakhe likhangelele ukuthi kuzakwenziwa ukhetho olungela dlakela hatshi okwenzakala manje kubandla leMDC-T.

UDokotela Silviu-Gabriel Barbu, omele ilizwe leRomania eZimbabwe, uthe kuyadanisa okwenzakala kubandla leMDC-T.

Ingcitshi kwezembali, uMnu. Phathisa Nyathi, uthe kwele Zimbabwe udlakela yinto evamileyo ayimangalisi njalo kuMDC-T lukhanya luqhubeka ngoba kubangwa ubukhosi obutshiywe nguTsvangirai.

Uthe owayengumongameli welizwe uMnu. Robert Mugabe ngomunye owahlanyela loludlakela.

UKhansila Malandu Ncube webandla leMDC-T uthe sekuthunyelwe umlamulankuzi ukuthi azebona ukuthi bangakhulumisana njani njalo ozafumanwa elecala uzajeziswa ngokuxotshwa ebandleni.

Elinye njalo ilunga leMDC-T koBulawayo, uNkosazana Helen Mpofu, usole kakhulu udlakela olukubandla lakhe ethi lubangelwa ngabantu abangasibebandla lakhe.

Isakhamuzi sakoBulawayo, uMnu. Mandla Tshuma, laye uthe udlakela kubandla le MDC-T luhlasimulisa umzimba kodwa indaba yokudedelana yiyo esidale umsindo njalo lelibandla lizakhetha njani inkokheli eziqotho kuliwa kanje.

Udlakela oluqondiswe kuNkosazana Thokozani Khuphe selusolwe ngumhlaba jikelele, inengi lithi akukho okubangwayo ngaphandle kokuthi amanye amalunga ebandla lakhe awafuni kulandlea isisekelo sombuso ngoba uma silandelwa nguye obemele akhokhele njalo umhlangano wecongress yiwo omelet umkhuphe esihlalweni.

Abanye njalo ngabasola ukufakwa kwabasekeli bakhe ababili ngemva kwesisekelo bethi ngabe bengafakwanga bekungeke kwabalengxabanxoza esikhona manje. Abantu abanengi bathethe ithuba lokunanzwa kwelanga labesifazana emhlabeni jikelele ngokutshayela ihlombe uMaKhuphe bemkhuthaza ukuthi enganyampi inhliziyo ngokwenzakala kuye okwamanje ngoba ukuhlukuluswa kwakhe kubuyisela muva umzabalazo wokuhlomisa owesifazana.

Udaba Esilethulelwe NguAnnahstacia Ndlovu
please wait

No media source currently available

0:00 0:04:22 0:00

Facebook Forum

XS
SM
MD
LG