amalinks wokungena

Breaking News

Iqembu leWashington Nationals Lithola Isicoco seWorld Series


Bathabe okumangalisayo abadlali labaqeqetshi beqembu leWashington Nationals.

Iqembu lomdlalo we-baseball eleWashington Nationals izolo kusihlwa liphakamise isicoco seWorld Series kulandela ukunqoba kwalo eleHouston Astros.

Iqembu leli elalikhangelelwe ukuthi lizaxotsha umqeqetshi walo uDave Martinez ekuqaleni komnyaka kulandela ukudlala okungaqedakaliyo lokulahlekelwa ngumdlali omkhulu uBryce Harper lonyaka, lenze izimanga eHouston.

Lanqoba emidlalweni yokuqala eHouston ngeviki aphelileyo 2-0, lanqotshwa emagumeni alo eWashington DC 3-0 lingakabuyeli izolo eHouston.

Emidlalweni emibili ebisele, libhuqe eleHouston okubaqede amandla, laqolotsha laze laphakamisa isicoco seWorld Series. Umdlalo we-baseball unjengowe khilikithi nxa kukhangelwe imiklomelo lokutshaya ibhola kusetshenziswa ugodo olulungiswe ngobunono.

Abantu abasekela ibaseball kwele Melika. Iqembu leWashington Nationals lacina ukuthola isicoco esifana lese World Series ngomnyaka ka1924 lisabizwa ngokuthi yiSenators eyaguqula ibizo yaba yiTexas Rangers.

Iqembu leli lisungulwa ngomnyaka ka1969, lalibizwa ngokuthi yiMontreal Expos. Lithe lithola isisoco lesi izolo, belidlalelwa ngabadlali abalodumo abagoqela uMax Scherzer, Ryan Zimmerman, Stephen Strasburg, labanye abambalwa.

Kade bengqikilana leqembu leHouston Astros ngaphansi kwesihloko esithi ‘Stay In The Fight’.

Ukuze sizwe okunengi ngalokhu, sixoxe loDen Moyo, othanda umdlalo we-baseball, othi kuyajabulisa okwenziwe liqembu leli.

Facebook Forum

XS
SM
MD
LG