amalinks wokungena

Breaking News

Amnesty International: UMugabe Kathonisiswe Amacala Awenza Engumongameli


Owayengumongameli uMnu. Robert Mugabe.

Inhlanganiso elwela amalungelo oluntu emhlabeni jikelele eye Amnesty International isikhuthaze umongameli omutsha eZimbabwe ukuthi aqale uhlelo lokuthonisisa owaye ngumongameli welizwe uMnumnzana Robert Mugabe amacala awadala esabusa okugoqela ukwephulwa kwamalungelo oluntu, lenkohlakalo ukuze kungabi lenye inkokheli ezaphinda ikwenze lokho.

Umcwaningi enhlanganisweni yeAmnesty International obheke ukwephulwa kwamalungelo oluntu emazweni asezansi yezwekazi le Africa, uMnu. Lloyd Kuveya, utshele iStudio 7 ukuthi inhlanganiso le ifuna ukuthi ukuthi uMugabe athonisiswe ngalokho akwenza esabusa.

“Umongameli omutsha kufanele ethule inhlelo zokujezisa labo abadala amacala kuhulumende odluleyo. Kufanele abeleqiniso lokuthi loba ngubani owephula amalungelo oluntu lamanye amacala, labo bantu kufanele bajeziswe. Labalamacala enkohlakalo labo kufanele bajeziswe ukuze kube lohulumende omutsha ohlonipha amalungelo oluntu lenkululeko yabo.”

Abanye abantu abenze uMugabe watshiya umsebenzi.
Abanye abantu abenze uMugabe watshiya umsebenzi.

UKuveya uthi lokhu yikho kuphela okuzakwenza abahlukunyezwayo, lozulu jikelele owathathelwa amathuba okuphilakahle ngenxa yenkohlakalo, bathole ukuhlawulwa lokwelapheka enhliziyweni zabo.

Uthi ukujeziswa kukaMnumnzana Mugabe labanye abebemncedisa ukudala amacala, yikho kuphela okuzakwenqabela labo abayingxenye kahulumende kamnumnzana Mnangagwa ukuthi bangaqali ukudala amacala afanayo.

Isizalwane seZimbabwe, uNkosazana Magugu Khumalo, uthi uvumelana lawo umbono wokujeziswa kukaMugabe ikakhulu nxa kukhangelwa ucuku alwenza ngesikhathi seGukurahundi.

“Ngempela kufanele vele uMugabe athonisiswe ngamacala awenzayo ngoba nguye owayephambili ekutheni abahlukumeze laba bantu whether yikubabulala, whether yikuba raper whether yikubanyamalalisa. Whether uphilile, ushonile, kutheni kuye icala lakhe lizohlala limlandela njalo.”

Kodwa esinye isizalwane seZimbabwe, uMnumnzana Inchase Asiti, oseyisiphepheli kweleSouth Africa uthi akaxolelwe.

“UMugabe akumele ukuthi simbophe okwamanje. Kumele simnyeke because at least akatshiywe kanjalo ukuthi abone ukuthi an independent and a free Zimbabwe ukuthi ihamba kanjani.”

Ibutho libambisane lozulu ukuthi kususwe uMugabe esikhundleni.
Ibutho libambisane lozulu ukuthi kususwe uMugabe esikhundleni.

Langamazwi asekela ngesinye isizalwane seZimbabwe, uMnu. Mlungisi Tshabalala.

“Akaseseyi threat esizweni saseZimbabwe. Akayekwenje ezihlalele laphana ngoba sesalelwe yimzuzwananje ukuthi ayekwelusa amadada abokhokho bakhe. So thina asibhekeni ifuture. Let’s forgive and forget.”

Kodwake esinye isizalwane seZimbabwe esingathandanga ukuvezwa igama, sithi akulunganga ukuthi uMnumnzana Mugabe asisitheke ngengcebo ayithole ngesingundengude uzulu weZimbabwe esidla imbuya ngoluthi.

“Engifisa ukuthi ngabe kuyenzeka kuMugabe yikuthi bamthathele yonke into ayithole ngokungemthetho yonke. No matter wayezenzela yena kube ngumthetho. Babathathele bonke bobabili uMugabe lomkakhe bayebahlalisa e old age home, emzini la okugcinwa khona abantu abagugile.”

Phansi kombuso kamongameli Mugabe kwabulawa izinkulungwane zabantukazana eMandebeleni ngesikhathi seGukurahundi ngabo 1980s. Ngemva kokusungulwa kwebandla leMDC ngabo 2000 kwaqala njalo ukubulawa, ukuhlukunyezwa, ukutshaywa, ukudilizelwa izindlu, ukubotshwa mahlayana lokunyamalala kwalabo abebephikisana lohulumende wakhe.

Loba kunjalo imbiko yabezindaba engakafakazwa nguhulumende ikhombisa ukuthi uMnumnzana Mugabe wathenjiswa ukuxolelwa njengesinye sezizatho sokuthi ehle esihlalweni.

Inhlanganiso yeAmnesty International Ifuna uMugabe Athonisiswe Amacala Atshiyeneyo
please wait

No media source currently available

0:00 0:03:14 0:00

Facebook Forum

XS
SM
MD
LG