amalinks wokungena

Breaking News

ARTUZ: Asikwamukeli Okuvunyelenwe nguHulumende leApex Council


Amalgamated Rural Teachers Union of Zimbabwe
Amalgamated Rural Teachers Union of Zimbabwe

Ezinye inhlanganiso zezisebenzi zikahulumende zale ukwamukela okuvunyelenwe ngabomanyano weApex Council lomqhatshi eziqhutshwe phansi kwe National Joint Negotiating Council-NJNC, ngaphandle kwabenhlanganiso yababalisi eye Zimbabwe Teachers Association – ZIMTA abemukele limpumela ngezandla zombili.

Isivumelwano phakathi kwabe APEX Council lohulumende sibikwa silobelwane emhlanganweni owenzelwe e Victoria Falls emadabukakusa namhlanje.

Abezinye inhlanganiso zezisebenzi zikahulumende ezigoqela eyababalisi bemaphandleni eye Amalgamated Rural Teachers Union of Zimbabwe – ARTUZ balile ukwamukela limpumela besithi ayisikho abakade bekukhangelele.

Isikhulumeli se ARTUZ umnumzana Nation Mudzitirwa uveza umbono wenhlanganiso yakhe ngalesi sivumelwano.

“Ababalisi bakhala ngokuthi ukukhutshulwa kweholo kungaphansi kwalokho abekade bekukhangelele. Ababalisi bebekhangelele ukuthi bazothola isilinganiso sehlo lalelo ababelithola ngomnyaka ka 2018 ngoMpandula, I USD$500 – 00. Nxa lokhu kungenziwanga, njenge ARTUZ, kasiyenelisi ukubuyela emsebenzini ngaphandle kokuthi umqhatshi alungisise udaba lwethu.”

Ukungakhuphuki kweholo labo njengalokhoa kade bekukhangelele njenge ARTUZ u Mudzitirwa uthi kuzophazamisa indlela abasebenza ngayo.

“Kuyacaca ukuthi iholo lala lingafiki kulokho okufunwa ngababalisi. Ngalokho ingxoxo yeholo kuthiwa iyaqhubekela phambili kodwa thina njenge ARTUZ asibuyeli emsebenzini ingxoxo ingasiphanga esikukhangeleleyo.”

Isikhulumeli senhlanganiso ye ZIMTA umnumzana Tapson Nganunu Sibanda uchasisa izizatho zokwamukela lesi sivumelwano.

“Izikhulumeli ezinkulu zezisebenzi zikahulumende kanye lamatitshala ababalisi bonke ezweni, bezihlangene ke kusukela mhla ka 14 January kuze kufike ikuseni yalamuhlanje mhla 29 January kugcine kuvunyelenwe ukuthi uhulumende kabhadale yona leyo imali alayo ukuze ababalisi babe lakho abakuhlafunayo. Kodwa esizakunanzelela yikuthi lesi sivumelwano asitsho lutho kangako kumbalisi olambileyo kodwa ke akufani nje lokuthi nga kube lokhe kukhulunywa kukungaze kwamiwa ngoba uhulumende ubengelayo indlela yokuthi athi angabhadala ungazange kuke kusayinelwane phansi.”

U Sibanda ukuthi lokhu kutsho ukuba impilo yezisebenzi okugoqela ababalisi iqhubeka isiba nzima.

“Lanxa nje sikhuthazile ukuthi ababalisi kababuyele emsebenzini kodwa sithanda futhi ukuthi, ukuba sinanzelele ke ukuthi ukubuyela kwabo akungeke kube ngokwelanga elilodwa. Sikhuluma kanje nje omunye umbalisi akalayo yona eyokugada, kuzaze kuphele inyanga lapho azaze ayehola khona kunkhona ezathola indibilitshi yonaleyo angagada ngayo esiya esikolo. Siyakhuthaza ke siyacela lakuye uhulumende ukuthi bangahlukumezi amatitshala, bakhona abazasukuma bahambe baye emsebenzini, bakhona abanye okuzabehlula uze kufike phose ekupheleni kwenyanga. Ma uhulumende akwazi, akwazi ukubekezela ngoba laye kumehlule kwelakhe icele ukuthi anike ababalisi lokho abakufunayo.

Umsebenzi bayawuthanda sibili ababalisi kodwa behlulwa ngumumo ”.

Umpathintambo wogatsha lwezisebenzi uMnu. Paul Mavhima uthi lanxa uhulumende elesifiso sokwengezelela izisebenzi zakhe iholo ngesilinganiso esiphezulu udubo yikuthi isikhwama sakhe asila mali eneleyo ngakhoke akalenelisi iholo elifunwa yizisebenzi njengoba umnotho welizwe ungamanga kuhle.

Incwadi ebhalelwe amalunga aweZIMTA iveza ukuba obethola iholo eliphansi kuzisebenzi zikahulumende, selikhuphuke lisuka kumadola edlula kancinyane inkulungwane (RTGS1 045) yaya kumadola azinkulungane ezimbili lengxenye(RTGS 2 500).

Kusitsho ukuba ikhuphuke ngesilinganiso sokuphose ikhulu elilamatshumi amane ekhulwini (139,23).

Kuthi lowo obehola amadola phose inkulungwane ezimbili ( RTGS 1 885 – 00 ) ikhuphuke yaya kumadola phose inkulungwane ezinhlanu(RTGS4 631).

Abe ZIMTA bathi kodwa bazaqhubeka bebheke umumo wezenotho elizweni ukuze babuyele njalo kuhulumende ukuyakhulumisana ngokwengezelela lelo holo bekhuthaza amalunga ukuthi amukele isilinganiso asiphiweyo aphindele emsebenzini.

Udaba lweholo lezisebenzi zikahulumende siluphiwa nguMavis Gama
please wait

No media source currently available

0:00 0:05:06 0:00
XS
SM
MD
LG