amalinks wokungena

Breaking News

Asekhethiwe AmaSoccer Stars of The Year


Abadlali benguqu abadlale okwezinga eliphezulu kusigaba sePremier Soccer League lonyaka bakhethwe ngoMvulo njalo iqembu leChicken Inn, lona elithethe inkezo yeLeague, lilamaSoccer Stars of the Year amane.

Abadlali beChicken Inn laba ngabathi uElvis Chipezeze, uClemence Matawu, uEdmore Chirambadare kanye loDanny Phiri.

Iqembu leDynamos lona ilabadlali ababili ababalisa unozinti uTatenda MukuruvaloOcean Mushure.

Kuqembu leHighlanders kukhethwe uKnox Mutizwa, onguye njalo umdlali ozathola isicoco sokuba ngumgadli ohlohle kanengi kulabanye ngemva kokuhlohla amagole alitshumi lane.

Abanye abakuluhlu lwabadlale kuhle abazangena kukhalenda lonyaka nguStephen Makatuka oweCaps United, uBrian Muzondiwa oweFC Platinum, uRaphael Manuvire oweZPC Kariba lo Hillary Bakacheza oweTriangle.

Intathelizindaba yezemidlalo uNation Ncube uthi onozindaba baduba ngokukhangela amaqembu amakhulu kuphela nxa kukhethwa abadlali abadlale kuhle.

“Ngokubona kwami amaSoccer Stars akhethiwe abanye babo bayayenza kodwa abakhethayo basuka bakhangele amaqembu amakhulu betshiya amancane anjengabo Hwange lapho okulomfana onjengoPritchard Mpelele, kube lomfana odlale kuhle oweqembu leTsholotsho okuthiwa nguButholezwe Ncube,” kutsho uNcube.

Umqeqetshi kanye labonompembe abasebenze kuhle lonyaka bazavezwa emkhosini wokwethesa inkatha umdlali onqobe abanye bonke abakuluhlu olukhethwe namhla ngoLwesihlanu oluzayo khona njalo eHarare.

Kolunye udaba olumayelana lomdlalo wenguqu abalandeli beqembu leTsholotsho bathabe bamanzi nte ngemva kokuba leliqembu lisinde ekugunyulweni kusigaba sePremier Soccer League ngosuku lokucina lwemidlalo yeligi.

Iziqholo zeZhwane zibe ngutshiki lobhanqa 1-1 leHarare City ngoMgqibelo, okuyimpumela etshiye leliqembu lilemiklomelo engamatshumi amathathu lanye.

Iqembu leBuffaloes libe yilo elizakuyadlala kuDivision One njengoba liqede imidlalo yalo likuzinga lesine nxa usuka ngaphansi kwengalane njalo lilemiklomelo engamatshumi amabili lathoba munwe munye.

Umsekeli weTsholotsho uCharity Manyathela uthi yena vele ubekwazi ukuba iqembu leli belingeke ligunyulwe kusigaba saphezulu.

“Vele ngithabile angikwazi, lokhuyana okwe relegation besivele singekho kikho ngihle ngakubona phambilini, mina bengiphuphile awubonanga vele angizange ngibe le pressure,” kutsho uManyathela.

Amanye amaqembu agunyulwe kuLeague ndawonye leleBuffaloes ngathi eleFlame Lily, eleWhawha kanye leleDongo Sawmill.

Ngaphezu kwengalane iChicken Inn iqede ilemiklomelo engamatshumi ayisithupha lanye, ilandelwa yiDynamos kuthi kundawo yesithathu kuleqembu leFC Platinum lona lilandelwa ngeleTriangle elikundawo yesine.

XS
SM
MD
LG