amalinks wokungena

Asekuzinga Eliphezulu Amalungiselelo Ombukiso weZITF


Umgcinisihlalo wenkampani yeZITF, uNkosikazi Ruth Ncube.

Amalungiselelo ombukiso omkhulu wezamabhizimisi walonyaka owe Zimbabwe International Trade Fair (ZITF) asefike esibangeni esiphezulu.

Iziphathamandla zeZITF zithi sokulamankampani azabe esembukisweni lo ayisilinganiso sokungamatshumi ayisificamunwe munye ekhulwini – 91%.

Ikhansili yedolobho lakoBulawayo layo isiqalile ukuhlanza idolobho ilungiselela lumbukiso obuthanisa osomabhizimisi abasuka emhlabeni wonke jikelele.

Umbikiso walonyaka uzakwenziwa kusukela mhlaka 25 kuze kuyefika mhlaka 29 ngoMabasa. Indikimba yombukiso walonyaka ilesihloko esithi ‘Harnessing Linkages for Industrial Development’.

Umgcinisihlalo wenkampani yeZITF, uNkosikazi Ruth Ncube, uthi lokhe beqhubeka bekhangela ukuvuselelwa lokuthuthukiswa kwamafekithali akoBulawayo leZimbabwe jikelele ngokubambisana lamanye amazwe.

Iziphathamandla zenkampani ye Zimbabwe International Trade Fair (ZITF)
Iziphathamandla zenkampani ye Zimbabwe International Trade Fair (ZITF)

Uthi basebenza gadalala ukuthi lumbukiso ulethe amanye amazwe ukwenzela ukuthi azobukisa imitshina lezinye izindlela ezingaphathisa ilizwe ukuthi amafekithali aqalise ukusebenza koBulawayo.

Uqhubeke esithi bayathaba ukuthi labo abakhulumisana labo babhalisile ukuzobukisa njalo njengenjayelo amalanga amathathu akuqala - 25 kusiya ku 27 Mabasa - azabe engawebhizimusi njalo basazavulela uzulu ukuthi angene mhlaka 28 lo 29 Mabasa.

Izitendi zokubukisela lokhe zithengiswa njalo inkampani yeZITF ikhuthaze amankampani wonke ukuthi abhalise masinya ukuzobukisa njalo akudingi ukuthi baze bethwele imali ngezandla kodwa balakho ukubhadala besebenzisa imali yebulenjini.

Mhlaka 26 Mabasa kuzabe kulomhlangano wabosomabhizimusi iZITF Business Conference. Kuthi mhlaka 27 Mabasa iZITF izabe ibonisana lamafekithali ukuba bangawavusa kanjani behlangene lenhlanganiso yamabhizimusi iConfederation of Zimbabwe Industries.

Umbukiso weZITF 2017 ukhangelelwe ukuvulwa okusemthethweni mhlaka 28 Mabasa kodwa akukakhulunywa ukuba ngubani ozawuvula.

Eminye imibukiso ezabe ikhona kuZITF igoqela eyezokwethekelelwa kwelizwe owe A’sambeniAfrica Business Tourism Expo, leSchoolastica lePakPrint kanye le Ultim8 Home.

Kunengi okwenzakala embukisweni weZimbabwe International Trade Fair.
Kunengi okwenzakala embukisweni weZimbabwe International Trade Fair.

Kusenjalo, ikhansili yakoBulawayo isiqalile ukuhlanza idolobho ilungiselela umbukiso weZITF. Isikhulumi seBCC, uNkosikazi Nesisa Mpofu, uthe sebeqalile ukucenta, ukulungisa izibane zedolobho kunye lemigwaqo.

Amazwe asekhombise ukuthi azabe ekhona embukisweni wezamabhizimusi oweZITF 2017 agoqela iBotswana, iBrazil, China, Japan, Kenya, Malawi, Mauritius, Mozambique, Namibia, Pakistan, Russia South Africa leZambia.

Facebook Forum

XS
SM
MD
LG