amalinks wokungena

Breaking News

Asekuzinga Eliphezulu Amalungiselelo Okwakhiwa kweGodini Mall


Egodini Mall

Ikhansili yakoBulawayo ithi isifike esibangeni esiphezulu samalungiselelo okwakha indawo yamavinkili esilindweni semitshova eGodini, i-mall. Kulabasebenzela kulindawo okwamanje abedlula inkulungwane lengxenye, osekubangela ukuxokozela ngokuphazamiseka komsebenzi kwabaphila ngokuthengisela khona.

UMnumzana Themba Machekano othengisela eGodini uthi udaba lokwakhiwa kwendawo yamavinkili eye mall, ludaba abalubala kumaphephandaba njalo ikhansili yakoBulawayo ayikacaci kibo ukuba izakwakha ngoba inengi labantu abathengisayo sebaphiwa indawo zokusebenzela emkambo yembida lasegcekeni eliphakathi laphakathi kweMakhosi leHighlanders Club.

UMachekano uchaze ukuba bebefisa ukutholiswa indawo ezifinyelela abathengi ngoba akusizi ukutholiswa indawo ezakubanzima ukuba abathengi bafinyelele, njalo okwamanje iKhansili ibahlawulisa amadola alamacent angamatshumi amathathu ngelanga okutsho ukuthi mhlazana amavinkili eqala ukwakhiwa abanye balakho ukuswela indawo zokuthengisela.

Obona ngokwethulwa kwembiko enhlanganisweni yezakhamizi eye Bulawayo Progressive Residents Association, uMnunzana Zibusiso Dube uchaze ukuba bayathokoza ngokuthuthukiswa kwesilindo samabhasi eGodini wasecela ukuba iKhansili iqhatshe abasakhulayo bakoBulawayo ekwakhiweni kwe mall le kanye lokutholisa abantu indawo zokuthengisela ingaphela ukwakhiwa.

UNkosikazi Jenniffer Ndlovu othengisela eGodini uvumelane lembono kaDube ethi indawo yokuthengisa ngesikhathi i-mall isakhiwa sewayithola njalo uzakuya kuyo mhla iKhansili iqala ukwakha kodwa bafuna isiqinisekiso sokuba bazatholiswa indawo zokuthengisela mhla iphela ukwakhiwa ngoba sebeleminyaka bebhadala imali kuKhansili yokuba babelendawo eziqondileyo zokuthengisela.

Umanisiphala wakoBulawayo wabika ukuba uzaqala ukwakha i-mall le ngenyanga ezayo njalo usephume lendlela yokususa abathengisayo kanye lezimota ezithwala abantu ngendlela engasoze iphazamise umsebenzi wabo.

Abasebenzela Egodini bona bathi iKhansili ayikakhulumisani labo mayelana lokwakhiwa kwemall le, lokuqinisa ukuthi bazathola indawo zokuthengisela uma ingaphela ukwakhiwa.

please wait

No media source currently available

0:00 0:05:53 0:00
Lapho esitholakala khona

XS
SM
MD
LG