amalinks wokungena

Breaking News

Umanisiphala WakoBulawayo: Izakhamizi Azikho Engozini Yokuhlaselwa Yisihudo


Bulawayo City

UManisiphala wakoBulawayo uthi lokhu eqhubekela phambili evikela izakhamizi zaleli dolobho ekubambeni imikhuhlane yesihudo njalo kuze kube manje akukabi lomuntu osethe wabanjwa yisihudo yiiloba saluphi uhlobo.

UMqondisi wohlangothi lwezempilakahle kule ikhansili, uDokotela Edwini Sibanda uchasisa ngoluhlelo lokuvikela uBulawayo.

Uqhubeke ethi uBulawayo ulamanzi ahlanzekileyo adlula isilinganiso samazwe omhlaba ngakho umuntu osuka kwezinye indawo nguye ongeza lalumkhuhlane kodwa okwamanje basavimbile ukuqala kwesihudo edolobheni.

Kunjalo nje, amakilinika lezibhedlela emhlubulweni weMaNdebeleni jikelele asebenza engela mithi eqakathekileyo, izigulane sezibanjwa ngamandla ukuzithengela imithi emavinkilini athengisa imithi yamapharmacy.

Lokhu kuvele ngemva kocwaningo lokuhlolwa kwamaHealth Score Card ezabelweni yilabo abalwela amalungelo ezempilakahle.

Obona ngokuqhutshwa kwenhlelo zenhlanganiso eqhuba lolu cwaningo, eyeCommunity Working Group on Health eMaNdebeleni uNkosazana Nonjabulo Ncube uthi isimo sinzima, izigulane sezibhalelwa imithi ukuba ziyezithengela kumavinkili athengisa imithi. Ethi uhlupho oluhlangana lezigulane ludubo lokuswela imali, lokuhamba imango emide baphinde baswele ukwelatshwa ngesikhathi.

UMnumzana Mongi Khumalo esinye njalo isiphathamandla seCWGH uthi lolu dubo solutshiye impilo zezigulane zisengozini.

UMqondisi wezempilakahle eMatabeleland North, uDokotela Nyasha Masuka uvumile ukuba ugatsha lwezempilakahle lubhekane lokusilela kwamaphilisi lemithi, ethi okwamanje bakumatshumi lasikhombisa ekhulwini ekutholiseni izigulane amaphilisi ezweni, kubangelwa yikuphuza kweNational Pharmacy ukutholisa izibhedlela imithi eyeneleyo. Kodwa uqhubeke ethi abalegcikwane lengculaza, ufuba kanye labantwana abaleminyaka engaphansi kwemihlanu abasweli imithi ezibhedlela ngoba bakhona abayiphiwa zinhlanganiso ezizimeleyo.

Isimo sezempilakahle eZimbabwe silenhlupho ezinengi ngoba ilizwe alilamali yakwamanye amazwe yokwenelisa ukuba kuthengwe imithi eqakathekileyo njalo ilizwe aliziphekeli imithi. Ngaphandle kokusilela kwemithi ezibhedlela izigulane zihamba imango emide, odokotela labongi labo bayasilela osekubangele ukwehla kwezinga lezempilakahle ezweni.

please wait

No media source currently available

0:00 0:05:13 0:00

Facebook Forum

XS
SM
MD
LG