Lanxa uMongameli Mugabe esithi ukhetho kumele lwenziwe kungakedluli inyanga kaMbimbitho ngomnyaka ozayo, amacele womabili eMDC athi kasoze ancintise kulolo khetho nxa uMugabe engalumemezela eyedwa.
Ekhuluma ngoLwesihlanu olwedluleyo, uMugabe uthe ukhetho luzakwenziwa kungakedluli uMbimbitho kungelani lokuthi abeMDC bayakuvuma lokhu kumbe hatshi.
Kodwa abeMDC bathi bafuna kubunjwe isisekelo sombuso esitsha kuqala, kuqedwe udlakela njalo kuhlelwe uluhlu lwabalelungelo lokuvuta olutsha ngaphambilini kokhetho.
Isikhulumeli seMDC ekhokhelwa nguMnu Morgan Tsvangirai uMnu Douglas Mwonzora uthi ibandla lakhe lizimisele ukungena kukhetho yiloba nini, kuphela nxa konke abafuna kulungisiswe sokulungusisiwe.
Amazwi akhe agcizelelwe yisikhulumeli seMDC ekhokhelwa nguMnu Welshman Ncube, uMnu Nhlanhla Dube kungxoxo ayenze loNtungamili Nkomo weStudio 7.
