amalinks wokungena

Breaking News

Avalelwa kuQuarantine Amapholisa Alitshumi Lanhlanu-15 kweleBotswwana


Botswana Police

Kulamapholisa alitshumi lanhlanu akweleBotswana asebefakwe endaweni yokugcinela abanakanelwa ukuthi balomkhuhlane weCOVID-19, ngemva kokubopha oweZimbabwe otholakale elomkhuhlane lo.

Amapholisa la, kade ebophe omunye owesifazane ongene kweleBotswana okungekho emthethweni.

Umphathisihlalo wekhomiti ebona ngokuvikelwa komkhuhlane weCOVID-19 kweleBotswana, udokotela Kereng Masupu, wethulee umbiko lamuhla esithi kulamapholisa asengeniswe ngaphansi kokuhlala bodwa kuquarantine, ngemva kokunakanelwa ukuthi bangabe bethathele umkhuhlane weCOVID-19.

Lokhu kulandela ukuthi amapholisa la, edolobheni leGaborone, abophe umama weZimbabwe obengene eBotswana okungekho emthethweni.

Ngesikhathi evalelwe esitokisini elinde ukubuyiselwa ekhaya, owesifazane lo utholakale ukuthi ulomkhuhlane weCOVID-19.

Ibizo lakhe alikhitshwanga ngenxa yesinqumo sikahulumende weBotswana esokuvikela bonke abagula umkhuhlane weCOVID-19.

Amapholisa afakwe kundawo zokuvalelwa wodwa, balinde impumela ngemva kukuhlolwa ukuthi abalamkhuhlane weCOVID-19.

OweZimbabwe uhanjiswe esibhedlela seSir Ketumile Masire eGaborone, lapho okugcinwa izigulane ezilomkhuhlane weCOVID-19.

Omunye oweZimbabwe kweleBotswana, umnunzana Benjamin Sibanda uthi isimo esibhekane labantu bekhaya sinzima, okwenza ukuthi beqe imngcele noma bebhekane lengozi yomkhuhlane weCOVID-19.

"Isimo esikhona yikuthi ubulawa yicorona kumbe ubulawa yindlala. Abantu bekhaya ngileqiniso lokuthi balolwazi olugcweleyo lokuthi kumele bazivikele njalo bevikele labanye abantu, kodwa uma isisu singelalutho, kuphuma ezinye izinqumo."

Kukanti omunye wakhe, umnunzana Packers Ndlovu, laye uthi yisimo sekhaya esenza abantu babhensele ukuhlupheka beseqa umngcele bengena kwamanye amazwe.

"Nxa ungabona abantu bekhaya, imngcele ivaliwe, befohla besiyadinga imsebenzi, kutshengisa ukuthi isimo sibi kakhulu."

Ayisikho kwakuqala kutholakala abeZimbabwe abangena okungekho emthethweni kweleBotswana belomkhuhlane weCOVID-19, osokusenza lelo lizwe lesabele ukuba ingozi enkulu yokumemetheka komkhuhlane lo, izavela ebantwini abadabuka phandle kwelizwe.

EleZimbabwe lalo likhala ngokuthi izizalwane zalo ezivela kweleBotswana leSouth Africa yizo ezibuya sezibambe umkhuhlane weCOVID-19.

Facebook Forum

XS
SM
MD
LG