amalinks wokungena

Breaking News

Ayangqikilana Njalo Amaqembu Enguqu Emdlalweni yePSL


Imidlalo yesigaba seCastle Lager Premier Soccer League iqhubekela phambili ngempelaviki ngemva kokudedela imidlalo yenkezo ye Chibuku Super Cup kanye leqembu lesizwe elama Warriors.

NgoMgqibelo iqembu le Tsholotsho lizemukela ele Bulawayo City enkundleni yeLuveve, iqembu le Mutare City Rovers lizadlala leqembu le Harare City enkundleni ye Sakubva kuthi iqembu le ZPC Kariba lizadlala lele How Mine.

NgeSonto iqembu le FC Platinum lizadibana lele Highlanders enkundleni ye Mandava, iqembu le Hwange lizadlala lele Chapungu ngaseColliery, iqembu le Caps United lizadibana lele Ngezi Platinum ngase National Sports Stadium, iqembu le Triangle lizangqikilana lele Dynamos enkundleni ye Gibbo kuthi iqembu le Chicken Inn lizemukela iqembu le Border Strikers enkundleni ye Luveve.

Imidlalo ye PSL ingena kuviki yamatshumi amabili lathoba munwe munye iqembu le Caps United kuyilo elihlezi phezu kwengalane lilemiklomelo engamatshumi amahlanu lesikhombisa.

Udaba Esilethulelwe NguJoseph Njanji
please wait

No media source currently available

0:00 0:03:22 0:00
Lapho esitholakala khona

Kundawo yesibili kuleqembu le FC Platinum elilemiklomelo engamatshumi amahlanu lanhlanu kuthi ele Highlanders lisendaweni yesithathu lilemiklomelo engamatshumi amahlanu lantathu.

Umqeqetshi weqembu elimela ilizwe emdlalweni kakhilikithi uHeath Streak uthi isifiso sakhe ngesokuba bafinyelele ku final eyomncintiswano odlalwa ngamazwe amathathu abalisa ele Zimbabwe, ele West Indies kanye lele Sri Lanka, oqale ensukwini ezedluleyo esigodlweni iHarare njalo osuqhubekela phambili edolobheni lako Bulawayo.

Kweminye imidlalo eZimbabwe, umqeqetshi weqembu elimela ilizwe le Zimbabwe emdlalweni kakhilikithi, uHeath Streak, uthe sekulenguquko ekudlaleni kweqembu lesizwe njalo isifiso sakhe ngesokuba banqobe emidlalweni yabo ukuze labalandeli bomdlalo bakubone ukuba sekulengqubela phambili ekudlaleni kwabo.

“Isifiso sami yikuthi sizame ukuthi sifike kuma finals ngoba eqinisweni mina ngibona siyakwanisa ukuba sifike kuma finals kodwa njengoba sidliwe emdlalweni wethu wakuqala yikho ke kulomsebenzi omkhulu ngoba kumele sinqobe emidlalweni emibili kusiya phezulu.

“Into enkulu yikuba abadlali abalesikhathi eside bedlala kuqembu lesizwe beziphakamise ngoba yibo okumele sikwanise ukubathemba mihla yonke.”

Emdlalweni wakuqala owomncintiswano we Tri Series odlalwe ngoMvulo odluleyo, iqembu le Zimbabwe linqotshwe ngama wickets ayithoba minwe mbili kwathi emdlalweni wesibili iqembu le West Indies litshaye ele Sri Lanka ngama runs angamatshumi ayisithupha lambili.

Yomibili limidlalo idlalelwe esigodlweni iHarare ikanti umdlalo wesithathu ukhona kusasa ngoMgqibelo lapho iqembu le Zimbabwe elizadlala khona leqembu West Indies enkundleni ye Queens Sports Club koBulawayo.

UStreak ukhuthaze abalandeli bomdlalo kakhilikithi ukuba baze ngobunengi babo ukuzosekela iqembu lesizwe.

“Ngiyakwazi ukuthi ama supporters into abayifunayo ngama results yikho yisifiso sami ukuba lapha ko Bulawayo yikho esifuna ukubanika khona ukuze bebone ukuba sekusebenzeka. Bengabuya bazabona ukuthi ukudlala kwethu lokuzama kwabafana sekulomehluko.”

Umdlalo wesine owomncintiswano we Tri Series uzakuba phakathi kweqembu le Zimbabwe lele Sri Lanka mhla zingamatshumi amabili lanye kuthi owesihlanu uzakuba khona mhla zingamatshumi amabili lantathu phakathi kweqembu le Sri Lanka lele West Indies ikanti owesihlanu uzadlalwa phakathi kweqembu le Zimbabwe lele West Indies mhla zingamatshumi amabili lanhlanu kuyonale inyanga kaLwezi.

Amaqembu amabili azabe elemiklomelo eminengi ngemva komdlalo wesithupha azadibana kumdlalo wefinal mhla zingamatshumi amabili lesikhombisa.

XS
SM
MD
LG