amalinks wokungena

Breaking News

Azisafuneki Incwadi Zokuzalwa lamaAffidavit Ebantwaneni Abaya kweleSouth Africa


Umpathintambo wendaba zasekhaya kwele South Africa, uMnu. Aaron Motsoaledi

Wesulwe umthetho obamba ngamandla abakwamanye amazwe abeza labantwana kweleSouth Africa ukuthi baphathe incwadi zokuzalwa kanye lencwadi yamapholisa –iAffidavit - esekela ukuthi ngempela abazali bomntwana bobabili bavumile ukuthi aye kweleSouth Africa.

Embikweni owethulelwe abezindaba lugatsha lwendaba zasekhaya kweleSouth Africa, umphathintambo walolugatsha umnumnzana Aaron Motsoaledi, useyekethise ezinye zeziqondiso zomthetho wokungena kwabantwana bakwamanye amazwe kweleSouth Africa ukuze bavunyelwe ukuchapha umngcele bengelazo incwadi zokuzalwa lezemvumo yabazali njengalokhu obekusenziwa.

Ngesikhathi kusebenza lo umthetho abantwana abadabuka kwamanye amazwe kugoqela leZimbabwe bekudingakala ukuthi ohamba laye aphathe i affidavit ebhalwe ngabazali bomntwana bemupha imvumo yokungena laye kweleSouth Africa.

Nxa umntwana ehamba lomzali oyedwa, ongahambiyo bekudingeka abhale incwadi evumela omunye wakhe ukuthi angene lomntwana kweleSouth Africa.

Kodwake lolugatsha luthi kusukela ngoLweSihlanu lweviki ephelileyo abantwana bakwamanye amazwe lalabo abahamba labo sebelemvumo yokungena lokuphuma elizweni bengabuzwa incwadi zokuzalwa lale eyemvumo yabazali.

Lokhu kwamukelwe ngemibono etshiyeneyo yizizalwane zeZimbabwe esezihlala kweleSouth Africa.

Umkhokheli wenhlanganiso elwela amalungelo abesifazana beZimbabwe kweleSouth Africa eyeZim Imbokodo, uNkosazana Victress Mathuthu uyalincoma leli nyathelo esithi lizasiza kakhulu ngoba abantu bebethwele nzima.

“Utholumuntu ehamba labantwana eborder usethwele amaphepha amanengi angaka sekusiba lembuzo sekumele kusayinwe lapha lalaphayana. Utholukuthi noma abazali befise ukuthi abantwana bevakatshe, noma becabanga ngeprocess yakhona kube nzima ukuthi babavakashise. Kube sekusiba lobunzima futhi lakuma single parents. Sokumele ukuthi umzali afune omunye umzali ukuthi aze afake isignature yakhe ku affidavit kucine kusiba nzima.”

Unkosazana Hlulephi Ncube odabuka eNtulula eTsholotsho uthi bajabule kakhulu ngalesi simemezelo.

“Siyitshayela izandla kakhulu ngoba vele ibisihlupha thina omama ikakhulu omama laba abahlukane nabobaba nabogogo abahlala nabantwana abayizintandane loba abantwana abangenaboyise. So, bekusiba nzima kakhulu ma umntwana kumele ukuthi eze ngapha kweleSouth Africa. So, kuzoba lula kakhulu wonke umntwana ofuna ukuzovakatsha ngapha kweleSouth Africa use Free Africa free Mandela. Sijabulile kakhulu.”

Kodwa unkosazana Mathuthu ukhuthaza abazali ukuthi baqaphe ngeso elibanzi impethu ezingangena ngenxeba kule invumo.

“Akungabi yikuthi sekusenzeka ukuthi kube lula for laba abantu abenza izinto zokushushumbisa abantwana, bebachaphisa from amanye amazwe bebangenisa eSouth Africa kumbe bebakhupha eSouth Africa ukuthi sebezakubona kuyinto elula ukuthi akusoze kusafuneka zincwadi zokuthi zibavumele ukuthi bachaphe imingcele lalabo bantwana.”

Kodwa lolugatsha luthi abantwana abahamba bodwa kusadingeka ukuthi baveze incwadi zokuzalwa lemvumo yabazali. Inengi labeZimbabwe abasebenza kweleSouth Africa bebethwala nzima nxa befuna. abantwababo bebethekelele, kuthi ngokusweleka kwalezi incwadi bacine besiza labomalayitsha ngendlela ezingekho emthethweni.

please wait

No media source currently available

0:00 0:03:06 0:00


Facebook Forum

XS
SM
MD
LG