Udaba lwezimota ezithengelwe abakhokheli bamabandla aphikisayo amancane akumanyano wePolad luqhubeka lusegudwini abanye besithi uMongameli Emmerson Mnangagwa udlalise imali kahulumende lokuthi uzama ukuthenga amabandla lawa phambilini kokhetho.
UMnangagwa uphe abantu laba, abagoqela umholi webandla leNCA, uMnu Lovemore Madhuku, ama-Isuzu Twin Cap afika phose amatshumi amabili, 19, abikwa ethengwe ngemali edlula isigidi samadola eMelika.
UMadhuku utshele intathelizindaba ukuthi akulalutho olubi ngokwenziwe nguMnangagwa. Uthe njalo uzasebenzisa limota ukubhoda ngelizwe esakha ibandla lakhe.
Umkhokheli weMDC Alliance uMnu Nelson Chamisa yena wala ukungena kuPolad esithi ngumbuthano wamabandla asekela iZanu PF.
Umsekeli wesikhulumeli sebandla likaChamisa uMnu Felix Magalela Mafa Sibanda utshele iStudio 7 ukuthi lokho sokuvele sobala.
Kodwa umsekeli kamqoqi webandla likaMadhuku uMnu Gibson Sibusiso Moyo othe kabazihluphi ngalabo ababasolayo ngokuthengelwa izimota lezi.