Abalwa impi yenkululeko laba abangaba ngamatshumi amabili batshengisele ngokufola besuka eAfrica Unity Square belindwe ngamapholisa beqonde emahofisini kaMongameli Emmerson Mnangagwa befuna ukuyanikeza ugwalo lwezikhalazo zabo ezigoqela ukwengezelelwa inhlaulo zamampentsheni lokuthi zigcwaliswe izithembiso ezenziwayo ngesikhathi sokhankasela ukhetho lwalonyaka.
Okwamanje abalwa impi yenkululeko baphiwa impentsheni yamadollar edlula kancane amakhulu amabili-$234 nenyanga ngakhoke bathi bafuna ukuhlawulwa inkulungwane ezimbili zamadollar ngenyanga abayithenjiswayo ngomnyaka ka1997 ngakhoke kumele ihlaulwe kusukela ngalowo mnyaka.
Ukutshengisela lokhu kuveze sobala ukuthi kulokufuthelana phakthi kwenhlanganiso yabalwa impi yenkululeko njengoba abakade bekhona namhlanje besole kakhulu unobhala wenhlanganiso ye Zimbabwe National Liberation War veterans Association (ZNLWVA) njalo engumsekeli kamphathintambo obona ngendaba zabalwa impi yenkululeko uMnu Victor Matemadanda besithi uyehluleka ukummela izifiso zabo kuhulumende.
IStudio 7 kayenelisanga ukuzwa umbono kaMatemadanda ngaloludaba kanye lesikhulumeli senhlanganiso yabalwa impi yenkululeko umnumzana Douglas Mahiya njengoba ubengadobi ucingo lwakhe lukamakhalekhukhwini.
Kuthi inhlanganiso ye Zimbabwe Democracy Institute (ZDI) iphawule ugwalo olulesihloko esithi ‘Perceptions on corruption and service deliveriy in the Mnangagwa dispensation’ lapho abaveze ukuba udubo lwenkohlakalo lokhe lubhahile elizweni njalo oluqedwanga ngokususwa kowayengumongameli Robert Mugabe embusweni.
Ekhuluma ekusungulweni kwalolugwalo umkhokheli wenhlanganiso le uMnu Pedzisai Ruhanya uveze ukuba inhlanganiso inhlongothi zikahulumende ezifana lolwamapholisa kazikaqinisi umsebenzi wokulwisana lodubo lwenkohlakalo.
