Sokuyisikhathi somnyaka njalo lapho inzalo yeZimbabwe ihlanganela lomhlaba wonke ukunanza ikhefu leKhisimusi lanxa izizalwane zakuleli zisithi lonyaka akumnandi ngenxa yokungami kuhle kwenotho yelizwe okutshiye abasebenzela uhulumende bengatholanga iholo le Bonus.
Kuyinjwayelo ngalesisikhathi somnyaka ukuthi uzulu aphambane esiyale lale ezijabulisa inengi kungeliya emaphandleni ukuyabona izihlobo kuthakazelelwa iKhisimusi.
Inengi kuzulu, ikakhulu izisebenzi zikahulumende zivame ukusebenzisa imali yeholo le bonus ukujabulisa imuli lokuhlela inhambo ezitshiyeneyo kodwa lonyaka konke lokhu kube yize ngemva kokubanjiswa ilitshe nguhulumende obethi limali iyabuya kodwa kungela okwenzakalayo.
UNkosikazi Janet Sibanda uthi udabuke inhliziyo ngoba ehluleke ukuyabonana lezihlobo emaphandleni ngemva kokuthi imali ye bonus ingangeni emabhanga abo.
Uthi uqede ilanga lonke edideke ingqondo ngoba engazi ukuthi uzabathini abantwana abatshone bengela zigqoko zekhisimusi ngapha kumele adinge imali yokuhlawula izikolo lapho zivulwa.
UNkosikazi Siphiwe Mlotshwa, oyisakhamuzi, uthi lelilanga alibanga mnandi njengakweminye iminyaka engazi kumbe kwenziwa yikuswelakala kwemali elizweni kumbe vele abantu abasathakazeleli lelilanga njengeminyakeni edluleyo. Uthi lanxa kunjalo ukhangelele ukungena kumnyaka ozayo alethemba lokuthi uzabangcono abantu benelise ukuziphilisa.
Ekhuluma esedolobheni lakoBulawayo, uNkosikazi Nomatter Nyoni, uthi yena ujabule ukuthola ithuba lokutshona lemuli lezihlobo kungelani lomumo welizwe. Uthi kungenani umumo welizwe, lesi yisikhathi sokuthi abantu bajabule lezihlobo bakhumbule iNkosi okuyiyo okumele iqakathekiswe ngalelinga.
Kungakhathalekile ukuthi ikhisimusi ithakazelelwe njani, sokuphelile okwayo lonyaka abantu sebekhangelele umnyaka ozayo oqala ngeviki ezayo njengoba besitsho nje abadala ukuthi liphuma lendaba litshone lendaba.