amalinks wokungena

Breaking News

Bakhala Ngendlala Abaqeqetshi Bomdlalo Wenguqu


ZIFA

Abaqeqetshi bomdlalo wenguqu abasebenzela amaqembu adlala ezigabeni ezingaphansi bathi umangoye uselala eziko ngokumiswa kwezemidlalo kungenxa yomkhuhlane we Covid – 19.

Umqeqetshi weqembu le CIWU uMorris Mukwiti uthi uyesabela ukuba lalonyaka bazabulawa yindlala njengangalokhu okwenzakale nyakenye lapho umdlalo wenguqu ongazange udlalwe khona kwele Zimbabwe.

“Ibhola lavalwa manje abaqeqetshi baphila ngebhola, balemuli njalo kumele bathengele abantwana ukudla. Besicela osomabhizimusi labanye abayenelisayo ukuba basiphathise ngokudla ngoba kunzima, siphelelwe. Besikhangelele ukuba lonyaka kuzakuba lomehluko, ibhola lizavunyelwa. Akusahambanga ngaleyondlela njalo asisakwazi ukuba senzenjani njengabaqeqetshi bomdlalo wenguqu,” kutsho uMukwiti.

UMukwiti ubeseziphilisa ngokuthengisa okutshiyeneyo edolobheni lako Bulawayo manje kulezinsuku akayenelisi ukwenza lokhu ngoba uzulu engavunyelwa ukuhamba hamba santando kuyimizamo kahulumende eyokwehlisa inani labantu asebebanjwe umkhuhlane we Covid – 19.

Ukungadlalwa kwemidlalo kusukela nyakenye kutsho ukuba umqeqetshi osakhulayo uLoverty Mabunda kuzamele alinde ukuze aqale ukuqeqetsha kusigaba se Southern Region Division One Soccer League ngemva kokuba engenise iqembu leQuality Foods kulesisigaba ekupheleni kuka 2019.

“Sasisithi mhlawumbe ngemva kwensuku ezingamatshumi amabili lanye sizabuyela enkundleni kodwa umnyaka wonke waze waphela singazange sidlale njalo sahlukumezeka emoyeni.

Bekungela ebesingakwenza ikakhulu ngoba bekukunengi ebesifuna ukukulungisisa njengeqembu ebelimele lidlale okwakuqala kusigaba sika division one kodwa kasisakwenelisanga lokho.

Njengeqembu akusiphathanga kuhle kodwa abahlukumezeke kakhulu ngabafana bona abakade bekhangelele ukuba betshengise ikhono labo bebonwe ngamaqembu amakhulu. Kwazi bani mhlawumbe ngabe sesilababili kumbe abathathu asebedlala kusigaba saphezulu.

Okuqakathekileyo kodwa yikuba singalahlekelwa yimphefumulo njalo nxa kungenzeka ukuba uhulumende asiphe imvumo yokubuyela enkundleni kumele sibuyele siphelele sonke kungela abalahlekelwe yimpilo,” kutsho uMabunda.

Inhlanganiso yeZimbabwe Football Association nyakenye ike yapha amaqembu izimali zokuwancedisa kodwa leyomali iphume kanye kuphela njalo inengi lamaqembu likhale ngokuthi ibivele incane.

Lonyaka inhlanganiso yeZifa ibikhangelele ukuba amaqembu aqale ukuzilolonga ekuqaleni kuka Zibandlela kodwa lezonhlelo ziphazamiswe yikuphakama kwenani labantu asebetholakale belomkhuhlane we Covid – 19 okudale ukuba uhulumende amise abantu ukuhamba hamba santando elizweni.

Facebook Forum

XS
SM
MD
LG