amalinks wokungena

Bakhala Ngokungalondolozwa Kwamalungelo Abesifazana

  • Mavis Gama

UNkosikazi Edna Masiiwa, umqondisi wenhlanganiso yeWomen's Action Group, omunye walabo akade besemhlanganweni lo.

Lanxa eleZimbabwe selilesisekelo selizwe esincomekayo esamukelwa ngenjabulo ngoba sisipha umuntu wonke amalungelo afanayo, inkokheli yenhlanganiso ezilwela ilungelo labesifazana zikhala ngokuthi udubo yikungalandelwa kokumunyethwe yiso, ikakhulu endabeni zokulondolozwa kwamalungelo abesifazane elizweni.

Lokhu ngokunye kokuphume emhlanganweni owenzelwe emawofisini ommeli weMelika eZimbabwe, wokuxoxisana ngesimo sabesifazane eZimbabwe ngaphambilini kokunanzwa kosuku oluqakathekisa imisebenzi yabesifazane lukamhlaka 8 Mbimbitho, minyaka yonke.

Lumhlangano kade uqoqwe ngabomanyano wenhlanganiso ezilwela ukulondolozwa kwamalungelo lentuthuko kazulu, owe Crisis Coalition in Zimbabwe, ngaphansi kwesihloko esithi #BEBOLDFORCHANGE.

UNkosazana Sally Dura kade esemhlanganweni lo.
UNkosazana Sally Dura kade esemhlanganweni lo.

Okhokhela uhlangothi lwenhlelo kunhlanganiso le, uMnu. Thulani Mswelanto, uthe kungalesi sizatho bekubone kufanele bakhulumisane labenhlanganiso ezehlukeneyo ukwenzela ukubonisana ngesimo sabesifazana elizweni kizo zonke inhlangothi.

Kuvunyelenwe kulomhlangano ukuba kungumthwalo womuntu wonke ukukhankasela ukulondolozwa kwamalungelo oluntu ikakhulu abesifazane hatshi ukuqhubekisela phambili, ukukhangelelwa kwabo phansi ngoba kuthiwa akukho okukhulu abangakwenza.

Abamabandla ezombusazwe wonke labo bakhuthazwe ukuhlonipha isisekelo sombuso.

Kuthi uhulumende laye ucelwe ukuthi enze kube ludaba olusabalala kizo zonke inhlangothi elizweni, okubalisa olwezomvikela, ukukhuthaza ukulondolozwa kwamalungelo oluntu.

XS
SM
MD
LG