amalinks wokungena

Breaking News

Bakhala Ngokuvalelwa Ezindlini Okwamaviki Amathathu KweleSouth Africa


Umongameli Cyril Ramaphosa wakwele South Africa ekhuluma ngokulwisana leCoronavirus

Seziveze ukukhathazeka okukhulu izizalwane zeZimbabwe esezihlala kweleSouth Africa ngemva kwesaziso sikahulumende walelo lizwe sokuthi akekho ozavunyelwa ukuphuma endlini okwamaviki amathathu alandelayo emizameni yokwenqabela ukusabalala lokuthelelanwa kwegcikwane lecoronavirus.

Isaziso sikamongameli Cyril Ramaphosa sesitshiye abeZimbabwe bengazi ukuba iyozalankomoni empilweni yabo leyezihlobo ekhaya. URamaphosa wazise ukuthi konke kuzokuma khwimilili okwamaviki amathathu kusukela ngolweSine ebusuku.

“Ozake avele aphume endlini kungelasizatho esicacayo uzayifunda ivaliwe.”

Wonke amankampani azovalwa kusale lawo kuphela enza imisebenzi yokuthi akuphileki ingekho. La amankampani abalisa enza ukudla, imithi, abamabhanga, abezomvikela labezempilakahle.

Isizalwane seZimbabwe njalo engumgcinisihlalo wenhlanganiso elwela amalungelo abomama eyeZim Imbokodo unkosazana Victress Mathuthu uthi lelinyathelo lizatshaya kuzwele kuzizalwan zeZimbabwe. UMathuthu uthi njengoba inengi labeZimbabwe, bayazisebenza, baphila ngokuthengisa, ukulayitsha, ukwakha lokusebenza endaweni zokudlela kutsho ukuthi okwamaviki amathathu akulangitsho lendibilitshi abazayithola.

“Omama abaphila ngokuthengisa amathamatisi, imibhida loba zimpahla kumbe yini emigwaqweni, ma sebezahlala amalanga wonke lawa angamatshumi amabili lanye bevalelwe bengaphumi phandle bengathengisi, lempilo zabo phela zizakuma. Kanti bazaphila ngani? Bazadlani ngoba ukudla kwabo kusuka ekuthengiseni lapho. Nxa sebehlezi amalanga wonke lawa besendlini, kutsho ukuthi bazabulawa yindlala behlezi lapha endlini.”

Kodwake umongameli Ramaphosa uthi ngendlela igciwane lecoronavirus elimemetheka ngayo selihlasele abantu abedlula amakhulu amane selokhu kuqale linyanga, kuzafuze izwe lonke lingene empini yokulwisa leligciwane.

“Sithethe la amanyathelo abuhlungu ukuze simise ukumemetheka kwaleli gciwane.”

Umnumnzana Mlungisi Tshabalala yena uthi ukuvalelwa lokhu kutsho ukuthi abazali lezihlobo bazokufa ngendlala ekhaya ngoba konke abakudingayo empilweni kuvela lapha kweleSouth Africa.

“Njengezizalwane zeZimbabwe sisenkingeni enkulu kakhulu ngoba bonke abantu abasekhaya baphila ngezinto ezisuka nga eSouth Africa. Abasekhaya futhi abanengi baphila ngokuzo order nga eSouth Africa. Le 21 days shuwa izakuba ngumqanso omkhulu kakhulu ebatwini bakithi. Ma ilizwe lingelantoyalo, yikho obona khona nxa sekulezikhathi ezinjengalezi.”

Kodwake umnumnzana Dumiso Gama uthi lobanje imigoqole eyethulwe nguhulumende inzima njalo ibuhlungu, linyathelo eliqakathekileyo ekumiseni ukumemetheka kwaleli gciwane.

“Isifo lesi eqinisweni sikhona and siyabulala. Emazweni alemali, amazwe amakhulu anjengabo Italy sekufe abantu abanengi kakhulu ngalesi isifo. Siyabonga imizamo eyenziwayo yigovernment yethu yeSouth Africa. Asihlaleni ezindlini lathi sizinakakele sincedise uhulumende ngalokhu akwenzayo.”

Inengike lithi ukuhlala endlini okwamalanga angamatshumi amabili lanye yinto ezakuba nzima kwabanengi. Kodwake umongameli Ramaphosa uthi ozake alokothe ephule lumthetho uzawukhomba olotshwala.

“Amasotsha lamapholisa bezobe begcwele indawo yonke beqaphe labo abephula lumthetho.”

Kusenjalo ingcitshi zithi ngemva kwala amaviki amathathu inengi lamankampani azovalwa okuyinto ezakwenza impilo ibenzima okwamagama.

Udaba lokuvalelwa kweleSouth Africa ngeCoronavirus siluphiwa nguBenedict Nhlapho
please wait

No media source currently available

0:00 0:04:10 0:00


Facebook Forum

XS
SM
MD
LG