amalinks wokungena

Breaking News

Bakhalela Umdeni Kamuyi uMorgan Tsvangirai eGoli


Kukhalelwe umdeni kamuyi uMorgan Tsvangirai

Annahstacia Ndlovu

Amakhulu khulu ezizalwane zeZimbabwe, abasekeli bebandla leMDC-T kanye labamela inhlanganiso ezitshiyeneyo kweleSouth Africa, bebethe gwaqa lamhlanje ecaweni le Gospel Assembly Church elokitshini leYeoville eJohannesburg emthandazweni wenduduzo kulandela imfa yomkhokheli webandla leMDC-T, uMnumnzana Morgan Tsvangirai.

Abanye abantu behluleke ukuyakhalela umdeni kaTsvangirai ngenxa yokubambeka emsebenzini.

Izikhulumi ngokulandelana kwazo zichaze umuyi njengeqhawe elizahlala likhunjulwa njalo njalo embalini yeZimbabwe.

Omunye wabasekeli bakaTsvangirai, uNkosazana Thokozani Khuphe, uthe umuyi ubeyindoda emadodeni lalokho akwenzele iZimbabwe kukhulu okumangalisayo. Uchaze indlela athuthukisa ngayo ilizwe ngesikhathi sikahulumende womanyano ngesikhathi elizweni kungasela kudla lempahla ezitolo.

UMaKhuphe uthe akasoze aphumule iphupho lika Tsvangirai lokwethula umbuso okhululekileyo eZimbabwe lingakagcwaliseki.

“UTsvangirai akafanga. Umoya wakhe ulokhu ulathi njalo siyakwazi ukuthi zizanqoba kulolukhetho. Hamba kuhle mkhokheli wami. Hamba kahle mfowethu. Sizahlala sikukhumbula. Awuhambanga. Uzahlala ulathi njalo siyazi uzahlala usikhokhela.”

Ungcinisihlalo webandla leMDC-T eJohannesburg umnumnzana Mcedisi Bhebhe yena uthe njengebandla babonga umdali ngokubapha ithuba lokukhokhelwa yindoda efana lomuyi.

“Silahlekelwe ngumongameli esingakwazi ukuthi sizokwenza njani, kodwa njengabantu abakudiaspora okwamanje sijule ekuthini sihambe siyebeka umongameli ngesizotha. Sithi dudu bantu bakithi, akuhlanga lungehlanga.”

Langamazwi agcizelelwe ngomunye njalo weZimbabwe ngunobhala webandla leZimbabwe Communist Party, uMnu. Ngqabutho Mabhena.

“Sizoduduza imuli kaMorgan tsvangirai. Sizoduduza futhi amalunga eMDC-T njalo sisithi thina izizalwane zaseZimbabwe baduduzeke ngalokho okwehlileyo.”

Amazwi afanayo ethulwe njalo ngelinga ilunga e MDC-T kwele South Africa, uNkosazana Sibongile Nkomo.

“Lamhlanje ngiphatheke kabi ngokusitshiya kuka president wethu but ngithi uPresident mina ungifundise izinto ezinengi ukuthi njengoba singabantu beparty kufuze sibambane wther yena ukhona kumbe akekho so bengicela thina esiseleyo sibambane singalwisani.”

Abalandeli bebandla leMDC-T.
Abalandeli bebandla leMDC-T.

Abanye abebekule induduzo bagoqela izihlobo zikamuyi kugoqela lomama kamuyi, umfowabo labantwabakhe. Bekukhona njalo abameli bamanye amazwe atshiyeneyo kugoqela iMelika, iFrance, Norway labanye abanengi.

Abebekule induduzo bonke bebezwi linye ngokuthi iqhawe labo lilale ngokuthula.

KoBulawayo, umkhokheli webandla leZapu, uMnu Dumiso Dabengwa, ngomunye wabakhokheli bamabandla ezombusazwe asebethule amazwi enduduzo kumuli kamuyi.

UDabengwa uthe ngabe isisekelo esingavotelwanga ngomnyaka ka2000 saphumelela, uMugabe wayezasuswa esikhundleni nguTsvangirai.

Ungezelele esithi ngempela walwa ukulwa okuhle njalo besebefike esibangeni esiphezulu sokukhulumisana njengamabandla azimeleyo ukuba baye ekhethweni belenkokheli eyodwa manje njengoba esehambile njengamabandla aphikisayo sebezahluza babone ukuba ngubani ozabakhokhela besiya ekhethweni uma luzakubakhona lonyaka.

Esinye isakhamuzi sakoBulawayo, uMnu. Nkululeko Tshuma, olwela amalungelo oluntu eseFelabusi, uvumelane loDabengwa ekhala esithi ilizwe lilahlekelwe ngoba umuyi befuna ukuba abantu bazibuse.

UMfundisi Whiteman Ndlovu laye wethule amazwi afanayo esithi uTsvangirai ulwile ukulwa okuhle ngoba isilo ebengasesabi loba singaze sigile imikhuba engaqedakaliyo.

Facebook Forum

XS
SM
MD
LG