amalinks wokungena

Breaking News

Bamzondele Abalandeli Bomdlalo Wenguqu Umqeqetshi weZimbabwe Warriors uLoga


Umqeqetshi weqembu leZimbabwe Warriors, uZdravko Logarusic

Uzulelwa zinkozi umqeqetshi weqembu labesilisa elimela iZimbabwe emdlalweni wenguqu, uZdravko Logarusic ngemva kokunqotshwa kweqembu lama Warriors 1 ka nya ngele Ethiopia kumkhankaso we 2022 Qatar World Cup qualifiers.

Iqembu lama Warriors yilo eselijeke amanye engalaneni yemiklomelo yesibaya sika Group G ngemva kwemidlalo emibili njalo lesisimo sitshiye abalandeli bomdlalo wenguqu bezonde begane unwabu.

Ukunqotshwa kweqembu lama Warriors ngele Ethiopia kutsho ukuba umqeqetshi uZdravko Logarusic wenelise ukunqoba kanye emidlalweni elitshumi lane eziphethe esidukwini.

Inengi labalandeli bomdlalo bathi kumele axotshwe kodwa yena ekhuluma lentatheli ekupheleni komdlalo uthe ithuba lisasekhona elokunqoba emidlalweni eseleyo.

“Bekungumdlalo onzima njalo ekucineni iqembu le Ethiopia lihlohlile. Okungikhathazayo yikuba lathi siwatholile amathuba awokuhlohla kodwa kasiwasebenzisanga. Ekucineni sibulewe yisinqumo esithethwe ngunompembe.

Kungasenani asechithekile amanzi angeke siwabuthe sekumele sikhangele imidlalo elandelayo njengoba sizadlala kabili leqembu lase Ghana. Kumele sithathe yonke imiklomelo kuleyomidlalo lakwemibili ezalandela lapho.

Sizamile njalo indlela esidlale ngayo kasiyangisanga abalandeli bethu,” kutsho uLoga.

Owayengumqeqetshi weqembu labafana abaleminyaka elitshumi lanhlanu elimela isizwe emdlalweni wenguqu uDumaza Dube uthi kuvele sekuyinjayelo ukuba ilizwe leZimbabwe lingaqhubi kuhle emdlalweni wenguqu.

“EZimbabwe ukwehluleka kukhanya angani yinto esesiyikhwabitha kakhulu. Sikhwabitha ukwehluleka kasisakhwabithi ukuthi lathi sibe lilizwe elibonakala lihamba phambili emdlalweni wenguqu.

Wonke amaqembu amela ilizwe loba yiliphi, kungasikho ukuthi siqamba uLoga kuphela, ayehluleka. Yona iZifa, abakhokheli bayo bayehluleka. Kuyakhanya sibili ukuthi akulalutho esilwenzayo lapha,” kutsho uDube.

Ingcwethi yomdlalo wenguqu uBrian Moyo uthi kuyamangalisa ukuba sekufike phose iminyaka emibili ukukhonona kwabalandeli ngomqeqetshi uLoga kunganakwa.

“Ngibona angani akazitshanganga. Kulabantu abamqhatshileyo abawubonayo bawuhlole umsebenzi wakhe mihla ngemihla. Nxa bona bengenzi lutho kutsho ukuba basuthisekile. Yibo abantu esingakhuluma ngabo laba abasuthiseka ngemihlolo yempumela yalo umqeqetshi esilaye.

Phela akahlalanga mahala, kuyadula ukumgcina elizweni esenza imboza enje. Yibutshapha ukuba sibe sikhuluma ngaye okweminyaka emibili. Yimihlolo nje efana lalolubhubhane esibhekane lalo,” kutsho uMoyo.

Iqembu le Zimbabwe lisemsileni wengalane lilomklomelo owodwa eliwuthole ngemva kokuba ngutshiki lobhanqa lele South Africa emdlalweni walo wakuqala.

Phezu kwengalane kuleqembu le South Africa lona elilemiklomelo emine kuthi ngemva kwalo kule Ghana le Ethiopia njalo womabili lawa maqembu alemiklomelo emithathu iqembu ngalinye.

NgoMfumfu iqembu le Zimbabwe lizadlala imidlalo emibili lele Ghana kuthi ngoLwezi livakatshele kwele South Africa licine ngokwemukela ele Ethiopia.

Iqembu elizaphutsha imidlalo yezibaya liphezu kwengalane yemiklomelo yilo elizadlulela phambili liyexegwa lamanye kudingwa amahlanu azakuyamela izwekazi lase Africa kumidlalo yezizwe zomhlaba ngomnyaka ozayo.

Facebook Forum

XS
SM
MD
LG