amalinks wokungena

Breaking News

Abantu Abanengi Bachothoza uMugabe Ngokwenzakala eZimbabwe


Okwakekwanzakala ngosuku lokuzalwa lukaMugabe ...
Okwakekwanzakala ngosuku lokuzalwa lukaMugabe ...

Abantu abanengi bathi owayengumongameli welizwe leZimbabwe, uMnu. Robert Mugabe, wabhidliza ilizwe kusukela ngomnyaka ka1980 waze wasuswa esikhundleni libutho libambisane loMongameli Emmerson Mnangagwa ayemxotshe esikhundleni sokuba ngumsekeli wakhe.

Bethule lokhu emsakazweni weStudio 7 kanye lebulenjini bokuxhumana obeFacebook ngoLwesine kunanzwa usuku lweNational Youth Day oluqondana losuku lokuzalwa lukaMugabe.

Kulabanye njalo abathi loba uMugabe wayengenzi kahle, wayengcono kuloMnangagwa abathi usebhidlize ngamandla umnotho welizwe.

UMugabe ufikise iminyaka engamatshumi ayisitshiyagalolunye lanhlanu (95) kodwa lokhe wakhutshwa embusweni ngomnyaka ka2017, ilanga leli uselithakazelela elomdeni wakhe hatshi lamalunga ebandla leZanu PF.

UMnu. Richard Mahomva, ingcwethi ecubungula ezombusazwe, uthi leli langa seliqakathekele nje ukuthi linika uzulu weZimbabwe isikhathi sokuthi acabangisise ngempilo kaMugabe.

Lokhu kugcizelelwe ngomunye njalo ohlaziya ezombusazwe, uMnu. Tjenesani Mtungagwa, othi impilo kaMugabe kumele ibe yisibonelo esihle kwabasakhulayo ikakhulu indlela aziphatha ngayo eyiyo emenze aphile waze waphosa wakhokhoba.

Kodwa inengi lithi iphutha elikhulu uMugabe alenzayo yikudonsa isikhathi eside esembusweni kwabangela ukubhidlika kwenhlangothi zonke zempilo ikakhulu umnotho welizwe.

UMnu. Andile Nkomo, isakhamuzi seHarare, uthi uMugabe wayevele edalelwe ukukhokhela abensundu ukuze bathole uzibuse kodwa wasesenza iphutha lokubusa okweminyaka eminengi wacina esesiba lamaphutha amanengi.

Abanye bamchothoza kakhulu ngokusebenzisa ibutho leGukurahundi elabulala abantu abanengi okumangalisayo ngesikhathi uMugabe elwisana lomuyi uJoshua Nkomo owayekhokhela ibandla lePF Zapu ingakamanyani leZanu PF ngomnyaka ka1987.

Udaba Esilethulelwe NguGibson Bhebhe
please wait

No media source currently available

0:00 0:06:18 0:00

XS
SM
MD
LG