UBarry Daka, owake wadlalela iqembu leHighlanders waphinda njalo waba ngumqeqetshi weqembu leli lamanye, kasekho. Izihlobo zakhe zitshele umsakazo weStudio 7 ukuthi uDaka ubhubhele koBulawayo.
Indodakazi kamuyi, uLorraine Daka, uthi uyise uqale ukugula ngeSonto evela emdlalweni wenguqu wehluleka lokuyafika yedwa endlini yakhe ngenxa yokuthi ubehlanza njalo etshilwa yisisu.
ULorraine uthi udadewabo, ongudokotela, wethekelele uyise endlini yakhe lapho athole ukuthi ubesephela amandla. Uthi uyise ubhubhe emadabukakusa namuhla kulungiselelwa ukuyamelaphisa kwesinye isibhedlela lapho abezahlolwa khona umzimba wonke.
ULorraine uthi uyise obengumuntu othanda imuli yakhe, abantu lomdlalo wenguqu.
UDaka, owake waqeqetsha amaqembu agoqela eleRailstars, iZimbabwe Under 23 njalo labasakhulayo kuqembu leBulawayo Chiefs, wayengumqeqetshi weBosso ngomnyaka ka1986 iqembu leHighlanders lize lithole izicoco ezibalisa eseIndependence Cup, Chibuku Trophy, Rothmans Shield kanye leNatbrew Cup.
Ngesikhathi esifanayo, iqembu leli laphosa langena kuma finals omncintiswano weBAT Rose Bowl. Langena kumncintiswano weCAF champions league.
