Abasakhulayo sebeveze imbono ehlukeneyo phezu kwamazwi kaMongameli Robert Mugabe awokuthi akekho omunye olungele ukukhokhela ilizwe ngaphandle kwakhe.
Ekhuluma emkhosini wokuthakazelela ilanga lakhe lokuzalwa eMatobo ngoMgqibelo, uMugabe uthe uzaqhubeka esembusweni ngoba uzulu emthanda njalo engekho ongabusa njengaye.
Uthe uhulumende wakhe uyabaqakathekisa abasakhulayo ngoba yibo insika yobukhokheli bakusasa, okungamazwi amukelwe ngenjabulo ngosakhulayo weZanu PF, uMnu. Andifasi Banda.
“Ukusikhuthaza kwakhe kuyasipha intshukuntshu njengabasakhulayo ukuthi lathi singene ezikhundleni sibe ngamakhansila kumbe sibe ngemaMP,” kutsho uMnu. Banda.
Umbuzo odida ingqondo zabanengi ngothi kanti ontanga abasekela uMugabe, kuyini abenzela khona lona ilizwe limi manzonzo lemisebenzi ingatholakali?
“Okokuqala okwenza simsekele yikunikeza kwakhe abantwana beZimbabwe umhlabathi lokusipha imisebenzi,” kuchasise uBanda.
Kodwa umkhokheli wenhlanganiso yeEducation and Unemployed Youth Forum of Zimbabwe, uMnu. Zenzo Nyoni, uthe abasakhulayo laba akulalutho abalutholayo ngaphandle kokusetshenziswa nje yiZanu PF.
“Usizi yikuthi ontanga bebandla leZanu PF yilabana abangelanto yokwenza,” kutsho uNyoni.
Wengeze wathi umbuso kaMongameli Mugabe ngumbuso omubi ofundisa ontanga into ezingalunganga ezizakwenza ukuthi labo babe ngabakhokheli ababi kwelakusasa.
Ingcwethi ecubungula ezombusazwe uMnu. Nkululeko Sibanda yena utshele iStudio 7 ukuthi abasakhulayo bebandla leZanu PF basekela uMugabe ukuthi aqhubeke ebusa ngoba nguye yedwa umkhokheli abamaziyo.
UMugabe ukhuthaze njalo uhulumende wakhe ukuthu evuselele uhlelo lweNational Youth Service lona olusolwa kakhulu nguzulu esithi injongo ngeyokulongonga ontanga laba ukuthi bahlukuluze abantu ngesikhathi sokhetho.