amalinks wokungena

Breaking News

Bathukuthele Abantu Ngesinqumo Sokungabophi uNkosikazi Mugabe


Umkamongameli weZimbabwe uNkosikazi Grace Mugabe

Izizatho ezisetshenziswe nguhulumende wakweleSouth Africa ukuvikela uNkosikazi Grace Mugabe ecaleni lakhe lokutshaya owesifazana wakweleSouth Africa sezitshiye abanengi kweleSouth Africa bethukuthele.

Embikweni owethulwe ngeSonto, umphathintambo wogatsha olubona ngobudlelwalo beSouth Africa lamanye amazwe uNkosikazi Maite Nkoana-Mashabane, uthi ucabange ukupha uNkosikazi Mugabe isivikelo esiphiwa abadala amacala besemsebenzini wokumela uhulumende, esenzela ukuthi iSouth Africa igcine ubudlelwano obuhle leZimbabwe.

Ingcitshi zithi lesisivikelo bekungafuzanga siphiwe njengoba uNkosikazi Mugabe udale leli cala esiyabona abantwabakhe hatshi esemsebenzini wokuphelekezela umkakhe emhlanganweni weSADC.

Unina kaNkosazana Gabriella untombazana olinyazwe ngunkosikazi Mugabe, uNkosazana Debbie Engels uthi uthukuthele uganunwabo ngokwenziwe nguhulumende.

“Uhulumendelo usekukhombise kanengi ukuthi kungcono akhethe ukugcina ubudlelwano bakhe lamazwe angabangane kulokuvikela izizalwane zakuleli,” kusho uEngels.

Ngakolunye uhlangothi inhlanganiso yeAfriforum layo ithukuthele. Linhlanganiso ibibhalele unkosikazi Mashabane iphikisana lokuphiwa kukankosikazi Mugabe isisvikelo lesi, kodwa unkosikazi Mugabe wagcina ephuma elizweni lomongameli Mugabe ingaphiwanga ithuba lokuphikisana lesinqumo lesi.

Isiphathamandla sale inhlanganiso umnumnzana Willie Spies uthi sebesiya emthethwandaba ukuze loba yinini unkosikazi Mugabe angena khona kuleli alalanyelwe yingalo yomthetho.

Ingcitshi kwezomthetho wobudlelwano bamazwe uNkosikazi Amia Swart, yena uthi bekuvele kusegcekeni ukuthi uhulumende uzamvikela unkosikazi Mugabe. USwart uthi okubi yikuthi lokhu sekusehlisile isithunzi seSouth Africa sokuvikela amalungelo oluntu.

Uphinde wathi lokhu uhulumende ukwenze esazi ukuthi uNkosikazi Mugabe angavele ephume elizweni sekukulutshwana okungenziwa ukuze ajeziswe.

“Kuzabanzima ukuthi ajeziswe njengoba eseseZimbabwe. I Afriforum kuzafuze ithole indlela yokuthi isinqumo somthethwandaba leso siyesebenza eZimbabwe. Angiboni ukuthi lokhu kuzaphumelela. Ngicabanga ukuthi uhulumende uzamvikela. Ngicabanga ukuthi vele usephunyukile,” kusho uSwart.

Ibandla leDA lona lithi lifuna unkosikazi Mashabane azochazela iphalamende ukuthi kungani esebenzise amandla akhe ekwenzeni into engekho emthethweni.Ngokwethula isinqumo sesivikelo uhulumende ubekuveza obala ukuthi unkosikazi Mugabe ubengelaso lesi sivikelo ngakho bekufanele abotshwe.

Unkosikazi Mugabe uhle wangabuyi emhanganweni weSADC ngoMgqibelo kanti yena lomongameli Mugabe bahle bahamba ngeNsonto ekuseni lumhlangano ungakapheli. Umhlangano weSADC uphele izolo kanti akulanto ekhulunyiweyo ngeZimbabwe loba ngesenzo sikankosikazi Mugabe.

Udaba Esilethulwe NguBenedict Nhalpho
please wait

No media source currently available

0:00 0:03:08 0:00


Facebook Forum

XS
SM
MD
LG