amalinks wokungena

Breaking News

Zidla Ingqweqwe Zomlomo Izizalwane zeZimbabwe Ezidinga Imisebenzi eBotswana


Izizalwane zeZimbabwe zidinga umsebenzi emigwaqwni edolobheni leGaborone kwele Botswana.
Izizalwane zeZimbabwe zidinga umsebenzi emigwaqwni edolobheni leGaborone kwele Botswana.

Izizalwane zeZimbabwe ezabaleka ekhaya zayaphanda impilo kwele Botswana zithwele nzima kulelolizwe.

Impilo inzima kakhulu kulabo abangelamaphepha aqondileyo okuhlala eBotswana.

UMnu. Ndumiso Sibanda uphila ngokudinga umsebenzi ngokuma emigwaqweni eGaborone emelele abangamqhatsha. USibanda, owafika kwele Botswana ngomnyaka ka2003, kalamaphepha aqondileyo okuhlala elizweni leli. Uphila ngokudlala umacatshelana lamapholisa

Ensukwini ezisanda kwedlula, ubotshwe ngamapholisa wabiselwa ekhaya, kodwa ngenxa yesimo esilukhuni eZimbabwe, kathathanga isikhathi sokuthi abuyele emigwaqweni eGaborone lapho adinga khona umsebenzi.

“Sithwele nzima eBotswana, sidinga imsebenzi ayitholakali. Amapholisa lawo ayasihlupha. Ekhaya bayabe bekhangele ukuthi sibathumele imali kodwa kayikho. Kwesinye isikhathi siyatshona singadlanga.”

USibanda uthi udinga imisebenzi efana lokucenta, ukuhlakula kanye leminye nje eyezindlini, engamnika imali ngokuphangisa. Kodwa uthi kunzima noma angaze awuthole umsebenzi wakhona ngoba kalamaphepha aqondileyo okuhlala kwele Botswana.

“Uyenelisa ukwenzela umuntu umsebenzi, engakubhadali, ikakhulu angakwazi ukuthi awulamaphepha. Ungaze uyebika emapholiseni, wona akhangela ukuthi awulamaphepha, bengasakuncedi, sebekhangele ukukubisela ekhaya.”

Noma kunjalo, uSibanda labanye bakhe bathi ukubuyela ekhaya akukho engqondweni zabo. Uthi kungcono ukubhensela ukudubeka kwele Botswana kulokuya eZimbabwe.

“Lapha kungcono, uyenelisa ukuthi kwesinye isikhathi uthole okuncane. Manje ekhaya akulamisebenzi, akulamali, yikho sisalela eBotswana, noma amapholisa esihlupha. Lapha uyenelisa ukuthola okuncane uthumele abadala ekhaya. Manje ungahamba ekhaya liyafika likhangelane, liyakudlani?”

Banengi abantu abafana loSibanda. Omunye wabo nguNkosazana Emily Tshuma, osebenza ezindlini, othi akulula ngoba seliqongile inani labantu beZimbabwe elichaphela kwele Botswana lizodinga imsebenzi.

“Kunzima lapha eBotswana ngoba abantu bakithi sebebanengi labo bedinga yona leyo misebenzi.”

UMnu. Tawanda Mtumburanzou laye uthi uyazama ngazozonke indlela zokudinga noma yini engaletha imali. Uphila ngokuma emigwaqweni edinga umsebenzi. Kwesinye isikhathi uncedisa ukulayitsha impahla emabhasini ahambela eZimbabwe, njalo uthi uyagela abantu engabathola.

Kukhanya bebanengi abantu abavela eZimbabwe abalokhe befika kwele Botswana bedinga umsebenzi lobanje abanye babo abafika kudala elizweni leli besidla ingqweqwe zomlomo.

Udaba Esilethulelwe NguMartin Ngwenya
please wait

No media source currently available

0:00 0:03:38 0:00

XS
SM
MD
LG