Ngesikhathi abantu beZimbabwe kwele South Africa bebhekane lodubo lokukhahlanyezwa ngabanye abantu bakulelolizwe, kwele Botswana bahlukunyezwa ngendlela ezitshiyeneyo.
Izizalwane zeZimbabwe ezixoxe leStudio 7 zithi abantu bokuza bathwele nzima kwezokuthola uncedo ezibhedlela, ukungena kulelo lizwe lokunye okutshiyeneyo.
Bathe lobanje bengagijinyiswa ezitaladini ngaba Tswana, bathwele nzima ngokuhlukuluzwa okuphumiselwa egcekeni yiziphathamandla zelizwe leBotswana labantu makhaza.
Omunye wezizalwane zeZimbabwe, uMnu. Stanley Ncube uthi noma nje kungelakutshaya kumbe ukubulala abokuza eBotswana, isiphatho sakhona sifana nje lakwele South Africa lapho okubulawa khona abokuza obetheswa icala lokuthatha imisebenzi yonke njalo lokuxhwalisa abantwana babelilizwe ngezidakwamizwa njalo lokuthengisa imzimba.
"Eyabo iphakathi kuhulemende, kulobandlululo, kunzima uma ufuna uncedo noma usuhlale isikhathi esinganani ufana lomuntu osanda kufika. Konke khonokho kufana lokwenzakala eSouth Africa noma kungela dlakela phakathi."
Uthi ixenophobia yodlakela ize ibengcono ngoba abantu bayakwazi ukuthi babalekele ngaphi.
“Elodlakela ingcono ngoba umuntu uyakwazi ukuthi asuke ayehlala ngaphi, lapha bayakuvakatshela bekuhlukuluza noma ngaphi, konke khonokho yixenophobia."
Kukanti abanye abathi okubuhlungu yikuthi labo abangalamaphepha okuhlala eBotswana kabatholi sizo ezibhedlela.
“Abeselaphi ngenxa yokuthi bafuna ukuthi sibuyele ekhaya noma nje umongameli uKhama wathi kumele siyelatshwe ngoba licala uma umuntu efala kuleli."
Akupheleli khonapho kuphela, abanye bekhala ngokuhlukuluzwa ngamapholisa ikakhulu nxa kudingwa abangalamaphepha okuhlala elizweni, kukanti abanye bayancitshwa iholo labo ngemva kokusebenza endaweni ezitshiyeneyo, ikakhulu emapulazini kanye lezindlini.
AbeZimbabwe kwezinye indawo zeSouth Africa, ababuqhuthi ngenxa yokuqhamuka njalo nje kodlakela lubhekiswe kwabokuza. AbeSouth Africa bakhala ngokuthi abansudu abavela kwamanye amazwe babathathela amathuba emsebenzi ngakho bathi kabaphindele emazweni abo.
