amalinks wokungena

Breaking News

Bathwele Nzima Abazama Ukusebenzisa AmaTemporary Import Permits


Ngesikhathi amakhulu lamakhulu izizalwane zeZimbabwe ezihlala kwele Botswana zilungiselela ukuya ekhaya ngekhefu lePhasika, abatshayeli bakhonona ngokwehluleka ukuthola incwadi yezimota ama Temporary Import Permit (TIP), okumele atholakale ebulenjini be internet.

Ugatsha olubutha umthelo olweZimbabwe Revenue Authority (ZIMRA) lwasungula uhlelo lokupha incwadi zokungenisa imota eZimbabwe okwesikhatshana olwama TIP ebulenjini, ngenyanga edluleyo.

IZIMRA yathi lokhu linyathela lokuzama ukwehlisa inani labatshayeli abafola emngceleni etshiyeneyo belinde ukuthola ama TIP.

Kodwa abatshayeli sebekhonone ngokuthi abatholi usizo ebulenjini be internet bezama kodwa besehluleka.

Imzamo eyenziwe yiStudio 7 ukuthola leli fomu ebulenjini bunqgqikilane lomduli, ngoba ikhasi leZIMRA lisehluleka ukubhalisa abatshayeli ngokupheleleyo.

Omunye obefuna ukusebenzisa lokhu, uMnu. Rodwell Moyo, uthi laye useke wazama ukuthi athole iTIP ebulenjini kodwa wehluleka.

"Khona kungumzamo omuhle kodwa kumele bebone ukuthi kuyasebenza hatshi ukuthi sibe silokhe sizama singatholi impumelelo."

Abatshayeli kumele bengene ngenombolo zephasiphothi kukhasi lapho okutholakala khona iTIP, kodwa akweneliseki okwamanje.

UMnu. Carlton Ndlovu laye uthi kade bethabile ukuthi ukufola emngceleni belinde ama TIP sokuyinto edluleyo, ikakhulu bekhangele ikhefu elifana lephasika, kodwa ukwehluleka ukuthola la ama fomu ebulenjini kutsho into eyodwa.

"Kutsho sizaqhubeka sifola emngceleni, manje sikhangelane lekhefu eliphithizelayo elifana le pasika asilibonanga. Sithemba lokhu kuzalungiswa abantu bengakayi ekhaya.

Okuphuza ukunikeza amaTIP emngceleni yikho okwande ukuphuzisa izihambi, okumele zihlawule imali ephakathi kwamadola eMelika angamatshumi amane langamatshumi ayisikhombisa ukuthi bangene lemota eZimbabwe.

UMnu. Anele Nkomo uthi iZIMRA bekumele iqale ibelesiqiniseko sokuthi uhlelo lwayo luyasebenza ukuqotho ngaphambi kokunxusa abatshayeli ukuthi balusebenzise.

“Bekufanele benze babelesiqiniseko sokuthi uhlelo lolu luzasebenza, kuyadanisa ikakhulu sikhangele ikhefu kanje."

Inhlanganiso yeZIMRA kade ingakaphenduli imbuzo ethunyelwe ngumsakazo weStudio 7 okade ufuna ukwazi ukuthi inkinga ingabe ikuphi.

Kusenjalo, sekuqale ukuphithizela, izimota eziphuma eBotswana kanye leSouth Africa zilubhekise eZimbabwe, inengi lisiyahlanganela lezihlobo labangane ngePhasika.

Udaba Esilethulelwe NguMartin Ngwenya
please wait

No media source currently available

0:00 0:02:37 0:00

Facebook Forum

XS
SM
MD
LG