amalinks wokungena

Breaking News

Bayakhokhela AbeZimbabwe Ngemitshado Echithekayo eBhilithani


Izizalwane zeZimbabwe ezihlala kweleBhilithani ziyakhokhela ngemitshado echithekayo ukwedlula zonke izizalwane zamazwe aseAfrica ezihlala kulelolizwe.

Kucatshangelwa ukuthi isizatho esikhulu ngesokuthi abesifazana abanengi kabasavumi ukwenza imisebenzi evame ukwenziwa ngomama eZimbabwe beyenzela abayeni babo.

Umzekeliso; abanye kabasavumi ukuphekela abangakwabo lokubawatshela. Bathi lanxa babekwenza konke lokhu ekhaya, kabasakungeni lokho eBhilithani ngoba yikubancindezela.

Eminye imizi ichitheka ngezizatho ezigoqela ukuhukuluzwa kumbe ukutshaywa kowesifazana ngumkakhe.

Ngamafitshane, omama bathi sebewazi amalungelo abo.

UNkosazana Sharon Moyo ngomunye othi wayehlala ehlukuluzwa ngumyeni wakhe yacina iwuchithile umuthi inkonyane umtshado watshabalala.

“Ngihlale okweminyaka eminengi lendoda ingitshaya engenza yonk’into ayifunayo, edlala ngami, imali yakhe bengingayiboni engayisi nasekhaya,” kutsho uMoyo.

“Ukuza eUK kwangisiza kakhulu ngoba ngawathola amalungelo ami; akaselayo indlela yokuthi angihlukuluze.”

UMnu Ndlangamandla ngomunye wabachithekelwa yimizi njalo uthi ukutshiyana lowangakwakhe kwamdabula inhliziyo kakhulu.

“Ngibuhlungu ngoba besengihlale 15 years lalumfazi,” kutsho uMnu Ndlangamandla.

“Sasuka ekhaya kuhle sathe sifika lapha eNgilandi waqala ukuba labangane engasalali ekhaya. Ubehamba anyamalale azibuyele ngemva kwamalanga amabili. Bengithi ngimbuza angibophise, so kubuhlungu kakhulu. Sengicabnga ukuthi ngizihambele ekhaya.”

Eminye imitshado ichitheka ngemva kokufohla kwendoda kumbe umama esebone abanye. UNkosazana Thembi Mlilo uthi watshiywa ngumyeni wakhe eselandela omakhwapheni.

“Mina ngaletha iboyfriend yami from ekhaya wabuya lapha salungisa amaphepha sahlala sonke okwesikhatshana. Waqala ke umuntu ukujola, nango sengogijimisana labelungu,” kutsho uMaMlilo.

“Ubesenza into zakhe ngimkhangele nje eselokudelela lokhuyana okuthile ngaze ngabona ukuthi lapha akusela lutho kungcono lami ngitshiyane laye,” uqhubeke echasisa.

Indaba yabomama abahola imali enengi ukwedlula eyabayeni babo ngokunye lakho okwenza kubelokudelelana ezindlini.

Ukuhlala emazweni aphetsheya sokwenze inengi lezizalwane zeZimbabwe zathathela phezulu isiko lokuthi indoda lomfazi kuyalingana.

Ngesizatho lesi, inengi lithi akusela kuhloniphana, okusuke kwenze kube lula ukuthi imitshado ichitheke mahlayana njengempopoma zamanzi.

please wait

No media source currently available

0:00 0:03:36 0:00

Facebook Forum

XS
SM
MD
LG