Abalandeli bomdlalo wenguqu kweleBotswana baphakathi kwesililo ngemva kokubhubha komdlali obedabuka kweleZimbabwe, obe elodumo kulelozwe, uMgcini Sibanda, ofele ekhaya.
Onguye owamletha kweleBotswana, umnunzana Monakgotla Mojaki uthi umdlalo webhola ulahlekelwe ngokutshona kukaSibanda.
"Ngilokudana kakhulu ngokudlula kukaMgcini. Yimi engamletha kweleBotswana, ngiphathiswa nguMandla Mpofu, owabona ukuthi kuyadingeka ukuthi sibelomdlali oqinileyo esiswini senkundla. Ufike emcane kodwa wakhula emehlweni."
USibanda, obe eleminyika engamatshumi amathathu lantathu, ufike kweleBotswana ngomnyaka ka2012, esuka dlalela iqembu leZimbabwe, eleRailstars. Udlalele amaqembu ambalwa kweleBotswana agoqela eleFC Satmos, iOrapa United, iBDF XI kanye leSecurity Systems, ngaphambilini kokuba abuyele ekhaya nyakenye.