amalinks wokungena

Breaking News

Abaphethe iPula Lakwele Botswana Bakhala Ngokuqilwa koBulawayo


Imali yakwele Botswana eyama Pula

Abasebenzisa imali yakwele Botswana eye Pula bakhala ngokulinganiswa kwayo leRand lakweleSouth Africa linengi labaninibhizimusi koBulawayo, okutsho ukuba bathola imali encane, njalo bethi lokhu kufana lokuntshontshelwa libalele.

Kukhanya abasebenzisa iPula lakweleBotswana sebezithola bekusimo esifana labasebenzisa iRand leSouth Africa lona eliwe isisindo okwethusayo enyangeni ezedluleyo nxa liqathaniswa ledollar leMelika.

iPula lona liqinile kule Rand phose ngesilinganiso sokuyingxenye ekhulwini kodwa inengi, ngaphandle kwama hofisi kahulumende, lisebenzisa isilinganiso esifanayo ukuntshitsha imali zombili.

Lokhu kutshiye labo abasebenzisa iPula besizwa angathi batshaywe ngumbane ilanga libalele.

Umnumzana Mlamleli Joko uthi wethukile ngesikhathi esithi uthenga imphahlana yendlini ngamaPula kodwa wazithola entshitshelwa ngokufanayo leRand. Uthi kuyadula futhi ukuzama ukuntshintsha amaPula uwasa kumadola eMelika ayiwo afunwa linengi.

Umnumzana Mnqobi Sibanda laye kakuboni kuyindlela eqondileyo ukubophanisa imali ezimbili ezingalinganiyo.

Kukanti unkosazana Merlin Jamela uthi abantwana bangaze babathumele imali engamaPula ivela eBotswana, bathwala nzima ukuthi bayintshintshe ithole isisindo esiyifaneleyo.

Abathengisa emavikilini amanye koBulawayo batshele iStudio 7 ukuthi abanikazi bamabhizimusi ababaphi isizatho sokubophanisa iPula leRand noma nje okubili kungalingani ngesisindo.

Amabhizimusi amanengi athakazelela idola leMelika ngemva kokuba iRand liwe isisindo okuzwisa usizi enyangeni ezidluleyo, okukuthi osiphatheleni kade besipha amadola amahlanu kukhulu lamaRand.

XS
SM
MD
LG