amalinks wokungena

Breaking News

Bathenjiswa Ukubotshwa Abahleli eSouth Africa Okungekho Emthethweni


Lezi ncwadi ngezigoqela amaphasipoti, ama visa okusebenza, ama affidavit emota kanye labazama ukuchapha umngcele bengela ncwadi ezisemthethweni.

Embikweni owethulwe ngabogatsha lwendaba zasekhaya kweleSouth Africa, bathi izisebenzi zalo zizasebenza gadalala ngaleli khefu ukuze kungephulwa imithetho yokungena lokuphuma elizweni.

Bathi kuzaqatshwa kakhulu abasebenzisa amaphasipoti akweleSouth Africa bengayisizo zizalwane zakweleSouth Africa, abadindelwe amaphasipoti abo ngokungekho emthethweni, abalencwadi zokusebenza zesingundengunde lalabo abazama ukuchapha umngcele ngokungela mvumo.
Babika ukuba kuzazingelwa njalo abazama ukuchapha lemota besebenzisa incwadi zokuzibazela.

Lumbiko usutshiye inengi lezizalwane zeZimbabwe likhathazekile, ngoba lizimisele ukuya ekhaya ngaleli khefu kanti njalo inengi liyathinteka kula amaqembu azabe ethwalelwe ubhulo nguhulumende wakwele South Africa.

Esinye isizalwane seZimbabwe esingathandanga ukuvezwa igama, ngoba sisiya ekhaya kanti futhi sisebenzisa iphasipoti yakweleSouth Africa, sithi lokhu kuzakwenza leli khefu libemunyu kwabanengi.

Ngilana eGoli. Ngafika ngisesemcane, ngaphila, ngathatha incwadi zalana eGoli ukuze ngikwazi ukuding umsebenzi, ngodle abadala ekhaya lami ngiphilise umdeni. So uma eborder sekumele bathathe laba abanama South African documents abathi a fraudulent kodwa sawathola khona eHome Affairs, ma sebewathatha sekutsho ukuthi abafana nami angeke bakwazi ukuya ekhaya.

ISouth Africa ithi ngalelikhefu emngceleni kuzasebenza kakhulu i Border Maganement Agency egoqela ababona ngokuphuma lokungena kwabantu elizweni, amapholisa, abezokulima lezifuyo, abezemvelo, kanye labezokuphepha.

Esinye isizalwane seZimbabwe okhethe ukwaziwa kuphela ngokuthi nguNdlovu uthi lobanje leli kulinyathelo elizalimaza abanengi beZimbabwe ngaleli khefu lekhisimusi, kufanele umthetho lawo uthathe indawo yawo.

Hayi khona abantu esibazwelayo ngabantu abalemuli zabo abafuna ukuyabona abazali babo ekhaya. Laba izigilamkhuba hayi asibazweni. Sithi kumele siphile ngokusemthethweni sibe namaphepha.

Minyaka yonke ngoMpalakazi izizalwane zeZimbabwe ezisebenza kweleSoutha Africa ziphindela ekhaya. Banengike abathi ngokufika kweleSouth Africa bacina bethola incwadi zokuthi bayizizalwane zakweleSouth Africa.

Abanye vele abala ngitsho lephetshana okwenza bephume lokungena elizweni ngokungekho emthethweni. Minyaka yonke abaphuma lokungena emngceleni weBeitbridge inengi labo kungabeZimbabwe yibo abanengi kulezethekeli zonke eziphuma lokungena elizweni ngekhefu leKhisimusi.

please wait

No media source currently available

0:00 0:02:22 0:00
XS
SM
MD
LG