amalinks wokungena

Breaking News

Abalandeli Baka Thokozani Khupe Bazonde Bagan'unwabu Ngamawofisi eMDC-T


UNkosazana Thokozani Khupe.

Annastacia Ndlovu

Abasekela uNkosikazi Thokozani Khupe sebesole kakhulu isinqumo sedale leHigh Court esokuthi akumelanga uMaKhupe labanye bakhe, abangahambelani lecele lebandla leMDC-T elikhokhelwa nguMnu. Nelson Chamisa, basebenzise amahofisi ebandla leMDC-T koBulawayo.

Bathi kuyamangalisa ukuthi abalandeli baka Chamisa abakhokhelwa nguMnu. Gift Banda koBulawayo bancediswe yinkampani yamagqwetha eyeMathonsi Legal Practitioners elobudlelwano loMnu. Welshman Ncube obambisana loChamisa kumanyano weMDC Alliance.

UNcube ngomunye weziphathamandla zomanyano lo osufake uChamisa ukuthi ancintise kukhetho lukamongemeli oluzakwenziwa lonyaka.

UMnu. Witness Dube, umncebisi kaMaKhupe, uthi akulamuntu olamandla okuvimbela amanye amalunga ebandla ukuba asebenzise amawofisi ebandla leMDC-T. Uthi kavumelani lokwethulwe nguBanda kulandela isinqumo esethulwe ngumthethwandaba.

Banengi abalombono onjengoka Dube abathi kubi kakhulu ukuvimba amanye amalunga ebandla leMDC-T ukuthi asebenzisa amahofisi ebandla leli.

Olwela amalungelo oluntu uMqondisi weThis Constitution, uNkosazana Abigale Mupambi, uthi ukulwa okukuMDC-T kubi uma sekufike esibangeni sokuxotsha uNkosazana Khuphe emawofisini ebandla leli.

Usole ukuthi uMnu. Welshman Ncube usengenele kudaba lolu ngokumela iMDC-T emthethwandaba.

Isakhamuzi sakoBulawayo, uNkosikazi Charity Mpofu, uvumelane lokwethulwe nguNkosazana Mupambi.

Osakhulayo, uNkosazana Thando Gwinji, laye usole ukuxotshwa kukaNkosazana Khuphe emawofisini esithi sokusobala ukuba uyalwiswa lobanje ibandla leMDC-T lisephula isisekelo salo sebandla.

Abakucele lika Chamisa bathi umthethwandaba wenze kahle ngokuxotsha uMaKhupe labanye bakhe emawofisini ebandla leMDC-T.

Ingcwethi kwezombusazwe, uMnu. Effie Ncube, uthi uthi kudingakala ukubambana ngoba ukuvalelana phandle kuba yisibonelo esibi okulakho ukuphazamisa impumela yokhetho olulungiselelwayo.

UChamisa loMaKhupe balwela isikhundla sikamuyi uMorgan Tsvangirai lobanje ibandla leMDC-T selithethe isinqumo sokuthi uChamisa nguye osengumongameli walo njalo uzalimela kukhetho oluzayo.

Kodwa-ke uMaKhupe uthi nguye okumele abengumongemeli weMDC-T ngoba wakhethwa ngabantu hatshi nguTsvangirai.

Facebook Forum

XS
SM
MD
LG