amalinks wokungena

iQembu leBlack Rhinos Linqoba iTownship Rollers

  • Joseph Njanji

Iqembu le Black Rhinos Queens liphakamise inkezo ngemva kokubhaxabula iqembu lezivakatshi ele Township Rollers nge 4-0 ku-final eqhutshelwe enkundleni ye Hartsfield koBulawayo ngeSonto emini.

Abahlohlele iqembu le Rhinos ngababalisa uViola Ndlovu, uEmmaculate Msipa, uKudakwashe Basopo kanye lo Rutendo Makore.

Ekhuluma ngemva komdlalo uViola uthe indlela abazilolonga ngayo yiyo eyenze umehluko phakathi kweqembu labo lamanye amaqembu.

“Ngiyathaba kakhulu ngokuwina i-LM ngoba silungiselele kanzima silwela ukuba siyiphakamise njalo linkezo. Siyayibonga inkosi ngalokhu esenzele khona namhlanje.”

Njenge Black Rhinos sibambene njalo into engananzelelwa ngamanye amaqembu yikuba thina kasidinwa lula njalo akula ukuzondana phakathi kwethu njengabadlali.

Iqembu le Black Rhinos yilo ebelivele liphethe linkezo ngemva kokunqoba kwalo emncintiswaneni owenziwa ngomnyaka ka 2012.

Besekuleminyaka emine imidlalo ye LM Auctioneers Women’s Football Tournament ungadlalwa kodwa isikhulumeli sabaqoqi bawo uKundai Sithole uthi sebezaqhubekela phambili besiba layo minyaka yonke njengakudala.

“Mina ngingathi iLM Women’s Tournament iphumelele ngoba siyiqoqe ngesikhatshana kodwa senelisile ukuba yonke into ihambe ngemfanelo. Sike sama okweminyaka ethile kodwa sesiqalisile njalo sizaqhubekela phambili kasibuyeli emuva.”

Iqembu le Black Rhinos Queens lithole inkulungwane ezintathu zamadola aseMelika, inkezo kanye lemendulo zegolide ngemva kokunqoba kwalo.

Umgadli olitshayele kanengi egedini uvele kulo njalo iqembu le Rhinos ngemva kokuba uRutendo Makore ehlohle amagoli ayisikhombisa kwathi lonozinti obambe okwedlula abanye nguProcess Chatsamwa oweBlack Rhinos njalo ikanti uFrancisca Tsikwa nguye okhethwe ukuba ngumdlali olekusasa enhle emdlalweni wenguqu.

Iqembu le Township Rollers liphiwe inkulungwane elamadola alikhulu ngemva kokuphutsha likundawo yesibili kuthi iqembu le Chipembere liqede likundawo yesithathu ngemva kokutshaya ele Swallows nge 1 ka nya emdlalweni we third place play off.

Iqembu le Hearts of Oak ele Pumula North lona liphiwe umvuzo wokuba liqembu elilembeko iMost Disciplined Team.

XS
SM
MD
LG