amalinks wokungena

Breaking News

Iqembu leBosso Lixolisa Abalandeli Ngokungenzi Kahle Emdlalweni Wenguqu


UModern Ngwenya, osabambe isikhundla somongameli weqembu leHighlanders FC.

Ophethe isikhundla sikamgcinisihlalo weqembu lomdlalo wenguqu eleHighlanders, uModern Ngwenya, usexolise kubalandeli baleliqembu ngokungadlali kuhle kweqembu leli lonyaka.

Ekhuluma edilini elokugqiba umnyaka eliqhutshelwe kwelinye lamahotela atholakala edolobheni lako Bulawayo ngoLwesithathu ntambama, uNgwenya uthe lonyaka akusahambanga njengokufisa kwabo enkundleni njengoba iqembu le Highlanders liqede lisendaweni yesithupha engalaneni yemiklomelo ikanti alenelisanga lokuphakamisa lenkezo ebezidlalelwa lonyaka.

“Ngiyaxolisa kakhulu ngoba njengenkokheli umlandu ngowethu. Lonyaka akubanga ngumnyaka omuhle kithi. Asisoze silole ingqamu ukuthi sigwazane lapha kodwa iqiniso yikuthi imizamo sayizama kodwa asingeke sithi kwehlula ngoba aluba sehluleka iqembu leHighlanders lalizagunyulwa kusigaba saphezulu.”

Ukungaqhubi kuhle kweqembu leBosso kudale ukuba inkokheli yeqembu yesule uhlelo olujwayele ukuqhutshwa ekupheleni komnyaka olokunanza abadlali abayabe bedlale kuhle ngoba isithi kungaba lihlazo ukuthakazelela ukwehluleka kweqembu.

Inhlanganiso ebiphathisa iqembu le Highlanders ngosekelo lwemali kusukela ngomnyaka ka 2011 eye BancABC yiyo ehlawulele idili leli ikanti iqembu le Dynamos lalo ebelisekelwa ngemali yinhlanganiso efanayo lona likubone kufanele ukuba libonge abadlali balo njengoba liphutshe imidlalo lisendaweni yesibili engalaneni yemiklomelo.

Lo bekungumnyaka wokucina ibhanga le BancABC liphathisa iqembu le Highlanders lele Dynamos. UNgwenya uveze ithemba elokuba ngomnyaka ozayo iqembu le Highlanders lizadlala ngcono kakhulu kulalonyaka.

“Okuqakathekileyo yikuba silungisise konke obekungaqondanga ngo 2017 ukuze ngomnyaka ka 2018 sitshaye eziwayo.”

Ngemva kokuqhuba nzima kumidlalo yalonyaka, iqembu le Highlanders likhangelelwe ukwehlukana labadlali asebekhulile ekupheleni komnyaka.

Phezu kwalokho leliqembu likhangelelwe ukuqhatsha uMadinda Ndlovu, umqeqetshi owaziwa ngokupha ithuba abadlali abasakhulayo, ukuba ethathe isikhundla esitshiywe yisizalwane selizwe le Holland uErol Akbay ngomnyaka ozayo.

Udaba Esilethulelwe NguJoseph Njanji
please wait

No media source currently available

0:00 0:01:56 0:00

Facebook Forum

XS
SM
MD
LG