Abakumkhankaso wokususwa kwezijeziso ezabekelelwa enye inkokheli ye Zanu PF ekuhulumende weZimbabwe kanye lamankampani asebenzelana laye yiMelika, sebelensuku ezingamatshumi ayisikhombisa lanye -71 behlala lokulala betshengisela besithi eleMelika kalikhiphe lezo zijeziso.
Umnumzana Thabiso Mthethwa uthi akaboni ukuba lelinyathelo lizosiza ekuthini baguqule umbono wabo abe Melika.
Umnumzana Jonathan Mathe uthi lanxa kulinyathelo elincomekayo elithethwe ngabe BAAS lokukhankasela ukususwa kwezijeziso zenotho, akaboni kufezeka nxa eleZimbabwe lingaguqulanga okwabangela ukuba khona kwazo.
Omunye wabaphatheke kumikhankaso yokulondolozwa kwelungelo loluntu lombuso wentando kazulu, umnumzana Charles Nyoni uthi ukwenza kwabe BAAS kuveza obala ukuba besasekhona abalokhe bengazwisisi ukuba uhulumende wakwele Melika usebenza njani.
Uthi akaboni uNyoni uhulumende wakweleMelika ezisusa lezo zijeziso ngoba kube lehlekana labantu abatshengisela ngale indlela.
Iziphathamandla zehofisini yommeli weMelika e Zimbabwe, zithi ziyakwazi ukuba bakhona abatshengisela ngale indlela duzane labo.
Abamazwe abalisa ele China, South Africa, India lamanye bahlezi bekhankasela ukususwa kwalezi zijeziso ezabekelwa inkokheli yeZanu Pf ekuhulumende lamankampani akhe.
Kodwa ele Melika liqina ngelokuthi makuqalwe kulungisiswe okwavela kwabangela ukubekwa kwazo okubalisa ukulondolozwa kwelungelo loluntu kanye lokuhlonitshwa kwempahla kazulu ezetheswa ele Zimbabwe phansi komthetho owe Zimbabwe Democracy and Economic Recovery Act - ZIDERA.
