Annastacia Ndlovu
Uhlelo lwekhansili yakoBulawayo lokulungisa impompi ezindala ezithwala amanzi angcolileyo luqhubeka kakuhle emizini ethi Luveve, Ntumbane leMakhandeni lobanje ezinye izakhamizi zisithi azithokozi ngesiqhubu salumsebenzi bethi izitishi lokhe zidubuka okubafaka engozini.
Izisebenzi zeBulawayo City Council zibhode lentathelizindaba zibaboniswa uhlelo lolu eLuveve, eMakhandeni laseNtumbane lokudonsa ingcekeza empompini ezithwala amanzi engecekeza okuyikho okubangela ukudubuka kwezititshi njalo ezinye zezimpompi lezi sezindala ngoba zafakwa idolobho lisungulwa.
Izakhamizi zeNtumbane zithi laloba ikhansili isiqalile ukulungisisa impompi zengcekeza, kibo akukabi lomehluko.
Esinye njalo isakhamuzi seNtumbane, uNkosazana Bongani Moyo, uthe bahleli nzima ngoba lenkokheli zabo azikabonisi ukunakekela ubunzima abalabo.
Osakhulayo, uLewis Lunga, uthe akuphileki njalo abantwana besikolo abafunda eNtabeni bayawela emanzini engcekeza.
Ukhansila weLuveve, uNkosazana Tamani Moyo, uthe bayabonga ngohlelo lokulungisa impompi ezidabukileyo ngoba bebesebeleminyaka engamatshumi amabili bephila emanzini engcekeza egelezela ezindlini.
UMnu. Jobe Mlilo, esinye isakhamuzi seLuveve lapho uhlelo oluqale khona, uthe sekulomehluko ngendlela ikhansili ephatha ngakhona amanzi engcekeza.
UManjinela uLiberty Mkwata weMAC, inkampani eqhuba uhlelo lolu, ukhuthaza abantu ukuthi bakhangele amanzi ukuthi awalalutho bengakawachithi.
UManjinela uSikhumbuzo Ncube wekhansili yakoBulawayo uthe basebenza gadalala ukuba udubo lokudubuka kwempompi ezithwala amanzi engcekeza luphele.
Izakhamizi zeMakhandeni sezalima amabanana zisebenzisa amanzi engcekeza aseleminya egeleza njalo ikhansili icala izakhamizi ngokudubula ngabomo impompi ezithwala amanzi engcekeza ukuze bathelezele izivande zabo zamabanana.
Amanye amalokitshi abhekane lodubo lokugeleza kwamanzi engcekeza ezindlini lezifuleni yiMabuthweni, iMagwegwe, iLobengula, leCowdray Park,Nkulumane, Pumula, Nketa leMganwini.
Ikhansili yathola isikwelede ebhanga leAfrican Development Bank ukuthi ilungise zonke lezi ndawo umnyaka usiyaphela njalo lalapho amanzi engcekeza ahlangana khona ehlanjwa andubane aphinde asebenze lakho kuphakathi kokulungiswa ukuze amapaka athole amanzi okusebenzisa.