amalinks wokungena

‘Kasifuni Bumbulu Njalo iBosso Kayisoze Ibulawe’

  • Joseph Njanji

UJosphat Mzaca Ngulube etshengisela ngoLwesihlanu edolobheni lakoBulawayo esesithombeni sowayengumsekelei kamongameli uDr. Joshua Mqabuko Nkomo.

Umlandeli weqembu le Highlanders, uJosphat Mzaca Ngulube, utshengisele edolobheni lako Bulawayo ngoLwesihlanu ekhonona ngesijeziso esetheswa iqembu leBosso ngemva kobudlwangudlwangu obenzakala mhla leliqembu lidlala lele Dynamos enkundleni ye Barbourfields ngenyanga kaNkwenkwezi.

UNgulube ubhode idolobho lako Bulawayo ephethe ibhakane ebelilotshwe ngakwelinye icele ukuba imali efika inkulungwane ezine okumele ibhadalwe liqembu le Highlanders njengesijeziso esokuba abalandeli baleliqembu badale ukuba umdlalo walo leqembu leDynamos ungapheli ngenyanga eyedluleyo, inengi kakhulu.

Uphinde wakhonona kanye ngokuthi umgcinisihlalo weqembu leli uPeter Dube, owamiswa ukuphatheka kwezenguqu yinhlanganiso yeZifa, kabiselwe esikhundleni sakhe.

Ngakwelinye icele ibhakane likaMzaca belilotshwe ukuba “ubudlwangudlwangu abufunakali emdlalweni wenguqu, inhlanganiso yeZifa kayitshiyane lobukhohlakali, ezombusazwe kazifunakali ebholeni kanye lokuthi abonompembe betshiyane lokuphemba ubudlwangudlwangu.

Phezu kwebhakane kumacele womabili bekulesitsho esithi #Asifuni Bumbulu’, esidume ngemva kwawo umdlalo ongasaphelanga enkundleni yeBarbourfields mhla zilitshumi lane ngoNkwenkwezi, kuthi ngaphansi bekulotshwe ukuba “Ayisoze ibulawe!!! Uyala Umzaca.”

Ekhuluma lomsakazo we Studio 7 uNgulube uthe ukhethe ukutshengisela eyedwa ngoba ngendlela imuli yeHighlanders enkulu ngayo kungonakala nxa abalandeli baleliqembu bengatshengisela ngobunengi babo.

“Ngikhethe ukuba ngihambe ngingedwa ngihambe ngitshiya inhlupho esilazo ngimele abalandeli beHighlanders ezifana lokungaqhubi kuhle kwabonompembe kanye lokungacaci kukaPhilip Chiyangwa ukuthi ngowezombusazwe kumbe ngowomdlalo wenguqu yini.”

UNgulube uqale ukutshengisela kwakhe ngaphandle kwesitolo sePick n Pay Hyper wahamba wayadlula emahofisini enhlanganiso yeZifa wasecina esithombeni sowayengumsekeli kamongameli welizwe uDr Joshua Mqabuko Nkomo lapho afundele intatheli lozulu izikhalazo zakhe phezu kokuphathwa kweqembu le Highlanders zinkokheli zomdlalo wenguqu kweleZimbabwe.

Kolunye udaba olumayelana lomdlalo wenguqu, iqembu elimela ilizwe emdlalweni wenguqu elaziwa kakhulu ngegama elithi amaWarriors ngeSonto lizadibana leqembu elimela ilizwe le Liberia enkundleni ye National Sports kumdlalo walo wakuqala kumkhankaso owokudinga amaqembu azakuyadlala kumncintiswano we Africa Cup of Nations ozaqhutshelwa elizweni le Cameroon ngomnyaka ka 2019.

Facebook Forum

XS
SM
MD
LG