UMongameli Robert Mugabe sexwayise eleMelika leleBhilithani ukuba etshiyane lokungenela kundaba zeZimbabwe elungisise indubo abhekane lazo.
EleBhilithani lembeswe ludlakela oluqhamuke ngempelaviki kulandela ukudutshulwa komunye osakhulayo ngamapholisa njalo eleMelika libhekane lokubhidlika komnotho walo.
Udlakela lweBhilithani lolu lubangele ukutshiswa mahlayana kwezakhiwo ezitshiyeneyo lezimota esigodlweni iLondon kanye lokuntshontshwa kwempahla ezitolo ngabasakhulayo.
Ekhuluma emkhosini wokunanza ilanga lamabutho (Defence Forces Day) eHarare ngoLwesibili uMugabe usole amazwe womabili esithi angenela kakhulu kundaba zeZimbabwe.
Wengeze wathi ufuna amazwe la ekhiphe izijeziso amfakela zona leziphathamandla zebandla lakhe leZanu PF.
Inhloko kahulumende uMnu Morgan Tsvangirai laye uphathekile emkhosini wokunanza umsebenzi owenziwa ngamabutho lanxa nje engayanga embuthanweni wamaqhawe ngoMvulo.
Ukuhlaziya amazwi kaMugabe uNtungamili Nkomo weStudio 7 uxhume ingcwethi ecubungula ezombusazwe uMnu Brilliant Mhlanga yena othe kayitsho lutho insolo kaMugabe phezu kweMelika leBhilithani.
