amalinks wokungena

Breaking News

ConCourt: Kumele Kuhlawulwe Abantu Abaxotshwa Umsebenzi Mahlayana Ngomnyaka ka2016


FILE - Izisebenzi ezisebenzi emgodini esabelweni seMashonaland West.
FILE - Izisebenzi ezisebenzi emgodini esabelweni seMashonaland West.

Uzulu wamukele ngenjabulo isinqumo esenziwe ngumahluli womthethwandaba waphezulu owe Constitutional Court, sokuba zonke izisebenzi ezaxotshwa umsebenzi ngomnyaka ka2016 ngemva kokunikezwa inyanga ezintathu, ziphiwe inhlawulo yokuzihlawulela ukuphazanyiswa kwempilo yazo.

Lokhu kuza ngemva kokuba idale leConstitutional Court lilahle udaba obelulethwe emthethwandaba yinkampani yeGreatermans.

Omunye wabatshengise ukujabulela isinqumo sika Justice Malaba nguMnu. Njabulo Ncube, obona ngokuqhutshwa komsebenzi enhlanganisweni yeZimbabwe National Editors Forum.

UNcube uthe osekudingakala yikuba kuhlalwe phansi kudingwe amagqwetha azaphathisana lalaba bantu abaxotshwa umsebenzi ngaleso sikhathi.

Ingcwethi ecubungula ezombusazwe, uMnu. Bekezela Gumbo, uthe osekusenzakala yimizamo kahulumende yokulungisisa okwaphazanyiswa nguhulumende owayekhona ngomnyaka ka2016 owayekhokhelwa nguMnu. Robert Mugabe.

UGumbo uthe uMongameli Emmerson Mnangagwa utshengisa umhlaba wonke ukuba yena wenza izinto ngendlela ezehlukene kakhulu lalokho okwakusenziwa nguMnu. Mugabe.

Umqondisi wenhlanganiso ye Christian Voice International Zimbabwe, uMfundisi Tapfumaneyi Clement Zenda, uthe siyajabulisa lesi sinqumo.

UMnu. Nkosiyabo Sibanda, igqwetha elizebenzelana lenhlanganiso elwela amalungelo entathelizindaba eyeMedia Institute of Southern Africa, uthe isinqumo lesi sibonisa ukuba alokhe esanelisa amadale elizweni ukulondoloza amalungelo ezisebenzi.

Inkulungwane zezisebenzi zalahlekelwa yimisebenzi ngemva kwesinqumo esesisaziwa ngelokuthi Zuva Judgement esethulwa mhlaka 16 ngoNtulikazi ngomnyaka ka2016.

Umthethwandaba wanquma ukuba inkampani ilakho ukumisa umuntu umsebenzi ngokumnikeza ithuba lenyanga ezintathu kuphela njengalokho okwenziwa yizo izisebenzi nxa sezifuna ukutshiya umsebenzi.

Udaba Esilethulelwe NguMavis Gama
please wait

No media source currently available

0:00 0:04:21 0:00

XS
SM
MD
LG