Akazimiselenga ukuthatha umhlala phansi umqeqetshi olodumo uCosmas Zulu ngemva kokwehlukana kwakhe leqembu lomdlalo wenguqu ele Highlanders.
UZulu oleminyaka edlula amatshumi amahlanu esebholeni njengomdlali lomqeqetshi uthi udinga umsebenzi ngoba ulwazi aluthole kuminyaka yonke leyi akumelanga afe lalo kodwa kumele alwedlulisele phambili kubaqeqetshi abancane kulaye.
“Lonyaka iqembu le Highlanders alizange lengezelele isivumelwano somsebenzi ebengilaso labo yikho-ke sengidinga umsebenzi ukuze ulwazi lwami ngingalulahli. Wonke amaqembu angabe edinga utechnical advisor kumbe ugoalkeepers coach kabakhulumisane lami ukuze ngiphe abaqeqetshi babo ulwazi lolu kulokuthi ngiyengena egodini lolwazi lwami.”
UZulu owaziwa kakhulu ngegama elithi “Tsano” ufikise iminyaka engamatshumi ayisithupha lathoba minwe mbili eyokuzalwa mhla ziyithoba minwe mbili kunyanga kaZibandlela njalo uqale ukudlala ibhola ngomnyaka ka 1967 ekufikeni kwakhe edolobheni lako Bulawayo.
Udlalele amaqembu abalisa ele Bush Bucks, ele Eastern Midlands, ele Eastlands, ele Olympics kanye lele Mashonaland United engakabuyi kuqembu le Highlanders ngomnyaka ka 1980.
Ukuqeqetsha ukuqale ngomnyaka ka 1983 esekuqembu le Highlanders engumsekeli wesizalwane selizwe leScotland uBobby Clark.
Uthi uyalibonga kakhulu iqembu le Highlanders ngoba lidlale indima enkulu ekumakheni ukuba abe ngumqeqetshi ohlonitshwayo.
“Ngithanda ukubonga imuli ye Highlanders engiyisebenzele kusukela ngo 1980 kuze kufike khathesi lapho engithole khona izicoco ezedlula amatshumi amabili ezigoqela izicoco zeligi ezimbili.
“Ngiyazi imuli ye Highlanders liyangithanda kakhulu okokuthi nxa ngihamba esitaladeni abantu bayangimisa bengibuza ukuba kuhamba njani kuqembu lenu labazali bayangitshayela ucingo besithi bafuna ukuletha abantwana bezodlalela iqembu.”
UZulu uke wasebenzela amanye amaqembu abalisa ele AmaZulu, ele Railstars, ele Zimbabwe Saints, ele Quelaton, ele Zim Leopards, ele Sizane kanye lele Talen Vision kwele Zimbabwe ikanti uke wayasebenzela njalo kwele Botswana eqeqetsha iqembu le Botswana Meat Commission.