amalinks wokungena

Breaking News

'Banengi Abathintwe Yisiphepho Abalokhe Bengakatholi Uncedo'


Lanxa imizamo yokuhlenga lokuphathisa abahlaselwe lizulu lesiphepho eManicaland iqhubeka, uhulumende uthi banengi balokhe bengakafenyelelwa luncedo oluphuthumayo olufana lokudla abaludingayo ngoba lapho abakhona akufikeki kalula.

Umphathintambo obona ngokwakhiwa kwezabelo uMnu July Moyo uthi izimota ezithwale ukudla lokhe zisehluleka ukufika kwezinye izigaba ngenxa yemigwaqo eyatshabalalayo kwathi lamabholoho lawo adilika.

UMnu Moyo utshele umsakazo weStudio 7 ukuthi ngokubala kukahulumende, inani labafileyo lifika ku179 njalo abangaziwayo ukuthi bangaphi bangu329.

Kodwa inhlanganiso yeInternational Organization for Migration (IOM) ithi abantu abafileyo bangamakhulu amabili lamatshumi edlula kancane ayisithupha, 259.

Abenhlanganiso ezizimeleyo ezifana leWorld Food Program bona baqhubeke besipha uzulu weManicaland ukudla lezinye indingeko ezifana lemithi yokwelapha kanye lezigqoko.

IWFP iphiwe ihelicopter yokuthwala ukudla lokuhlenga abantu ngumanyano weEuropean Union. EleBhilithani lalo lithembise ukwengeza uncedo lwalo phezu kwe$23 million eliyiphe ngeviki edluleyo.

Kusenjalo, ibandla leMDC selikhuthaze umanyano weSadc ukuthi ubize umhlangano wesiphangiphangi uhlaziye udaba lomonakalo obangelwe yiCyclone Idai eZimbabwe, eMalawi laseMozambique.

Isiphathamanda seMDC, uDr Nkululeko Sibanda utshele istudio 7 ukuthi kuyadingakala ukuthi iSadc ihlangane ngokuphuthuma idingele abantu laba uncedo.

please wait

No media source currently available

0:00 0:02:31 0:00
XS
SM
MD
LG