amalinks wokungena

Breaking News

Ekugqibeni Uhambo Lwaso, Isikhonzi seUN Sixwayisa uMugabe Ngokhetho


Isikhonzi seUnited Nations esibona ngokulondolozwa kwamalungelo oluntu uNkosikazi Navi Pillay ugqibe uhambo lwakhe eZimbabwe ngoLwesihlanu ngenkuthazo yokuthi amazwe angentshonalanga esule izijeziso azifakela uMongameli Robert Mugabe labanye bakhe.

UNkosikazi Pillay, yena ofike elizweni ngeSonto emenywe nguhulumende ukuthi azehlaziya umumo wamalungelo oluntu elizweni, ukhuthaze njalo uMugabe ukuthi ame kancane ngokhetho andubana kulungisiswe konke okuhluphayo njalo kube lesisekelo sombuso esitsha.

Uthe ukhetho lungenziwa lonyaka njengokufuna kukaMugabe kungabanga lenguquko eqotho kwezombusazwe, kulakho ukuqhamuka udlame olukhulu elizweni olwedlalo olubekhona kukhetho luka2008.

UPillay utshayele ihlombe uhulumende womanyano ngokubumba ikomishini ebona ngamalungelo oluntu wakhuaza ukuthi uhulumende enze konke okudingakalayo andubana iqalise umsebenzi wayo.

Wengeze wathi ikomishini le kumele ikhangele isimo samalungelo oluntu kathesi lesikhathini esizayo, esithi izehlakalo ezifana leGukurahundi kanye lodlame luka2008 kuzamele zibunjelwe ikomidi ezazihluza.

UPillay uthe izijeziso kumele zibekwe eceleni ukuze ilizwe linikwe ithuma lokulungiselela ukhetho olukhululekileyo. Uthe izijeziso lezi ziphazamisa uzulu weZimbabwe jikelele hatshi iziphathamandla zeZanu PF kuphela.

Umphathintambo wezemithetho uMnu Patrick Chinamasa, olilunga leZanu PF, utshele intathelizindaba ukuthi izijeziso kumele zesulwe ngokugcweleyo hatshi ukubekwa eceni njengokutsho kukaPillay.

Ekhuluma phezu kodaba lokhetho, uChinamasa uthe eleZimbabwe lilizwe elizimeleyo elingamelanga litshelwe yiloba ngubani ukuthi lenzeni, njani njalo ngasiphi isikhathi.

Ingcwethi ecubungula ezombusazwe uMnu George Mkhwanazi uthi izijeziso ezafakwelwa uMugabe labanye bakhe azimelanga zisuswe iZanu PF ize iguqule izenzo zayo.

XS
SM
MD
LG