amalinks wokungena

Breaking News

'Abantu beZimbabwe Abangelamaphepha Aqondileyo Kabavunyelwe Ukusebenza Emapulazini eBostwana'


Abadabuka kwele Zimbabwe abadinga umsebenzi emigwaqwni edolobheni leGaborone kwele Botswana.

Elinye ilunga ledale lephalamende kwele Botswana selikhuthaze uhulumende walo ukuthi amise ukubuyisela ekhaya abadabuka eZimbabwe abangena kulelolizwe okungekho emthethweni.

UMnu. Abram Kesupile, owebandla eliphikisayo eleBotswana National Front, uthi kumele uhulumende abaphe amaphepha okusebenza kuzigaba ezifana lokwakha kanye lemapulazini.

Uthi kumele basebenze sebenikwe amaphepha aqondileyo okuhlala kwele Botswana.

EleBotswana libuyisela inkulungwane lenkulungwane zabadabuka eZimbabwe abangena kulelozwe okungekho emthethweni, kodwa phose bonke, baphinde bangene futhi.

UKesupile uthi akuncedi ukuthi uhulumende asebenzise izigidi zamapula exotshanisana labangena elizweni okungekho emthethweni.

Uthi kumele abanikeze amaphepha besebenze endaweni ezitshiyeneyo ezifana lokwakha kanye lemapulazini, imisebenzi eyande ukukhangelelwa phansi ngabantu ngaMatswana.

Kulamanye amalunga edale lephalamende alombono ofana loka Kesupile.

Abanye abadabuka eZimbabwe abahlala kwele Botswana abafana loMnu. Dumisani Dube bathi kungaba ngumbono omuhle lowo, ikakhulu ngesikhathi amaphepha okusebenza kumbe ukuhlala eBotswana engatholakali mahlayana.

“Kungaba ngumqondo omuhle ikakhulu sikhangele ukuthi kunzima ukuthola amaphepha okwenza ukuthi abantu bekhaya bengene eBotswana okungekho emthethweni.”

Inengi labeZimbabwe elingena eBotswana okungekho emthethweni lizithola lisebenza ezindlini, emapulazini kanye lekwakheni.

UNkosazana Elinet Ndlovu, osebenza ezindlini eGaborone, uthi kungabajabulisa uma idale lephalamende yeBotswana lingadlulisa lombono,ube ngumthetho.

“Singena nzima njalo siphila nzima kwele Botswana. Sidlala umacatshelana lamapholisa. Uma kunganikezwa amaphepha, kungabalula kithi kanye lakuhulumende ukuthi engatshoni exotshana lathi.”

Omunye oweZimbabwe njalo, uMnu. Cephas Ncube, uthi kusobala ukuthi eleBotswana alenelisi ukuqeda udubo lwabangena elizweni okungekho emthethweni, ngakho umbono yelunga ledale lephalamende kumele ukhangelisiswe.

“Ngumqondo ongakhangelisiswa. Kwele South Africa bayakwenza njalo ayisikho kungatsha ezifana lezokwakha kanye lemapulazini lapho okutholakala abangalamaphepha kuphela. Abanye basemahofisini amakhulu, ngakho kungaphathisa inengi.”

Umbono kaKesupile uzaqhubeka uhluzisiswa edale lephalamende.

'Abasebenze Emapulazini Lendaweni Zokwakha Abadabuka eZimbabwe Abangelamaphepha Aqondileyo'
please wait

No media source currently available

0:00 0:02:32 0:00

Facebook Forum

XS
SM
MD
LG